ރައީސް އަބްދުﷲ ޔާމީންގެ މައްޗަށް ކޮށްފައިވާ ނުހައްގު ހުކުމެގެ އިސްތިުނާފުގެ ހުކުމުގެ މައްސަލަ ހައިކޯޓުން ލަސްކުރަމުންދާއިރުވެސް އެކަމާ ބަހެއް ވިދާޅުނުވެ ޖޭއެސްސީގައި، ރުހުން ނުލިބި އިންނެވި އެޓާރނީ ޖެނެރަލް މަސައްކަތްޕުޅު ނުކުރައްވާތީ ފުވައްމުލަކު މެދު ދާއިރާއަށް މަޖިލިސް އިންތިހާބުގައި ރައީސް ޔާމީންގެ ތާއީދާއެކު ވާދަކުރައްވާ ޝިފާގު މުފީދުގެ ނުރުހުން އަމާޒުކުރައްވައިފިއެވެ.

ޝިފާގުގެ ނުރުހުން އަމާޒުކުރެއްވީ ރާއްޖޭގެ ސިޔާސީ މަސްރަހަށް ބަލާލާ ޗެނަލް13 އިން ގެނެސް ދޭ ޕީއެންއެފް އަދާހަމަ ޕްރޮގްރާމުގައި ވާހަކަ ދައްކަވަމުންނެވެ.

އެގޮތުން ޝިފާގު ވިދާޅުވީ، މިހާރު ވެރިކަމުގައި ތިއްބެވީ، ރައީސް ޔާމީނަށް ކޮށްފައިވަނީ ހަރާން ނުހައްގު ހުކުމެއް ކަމަށްބުނެ އަޑު ހަރުކުރަމުން އައި ބައެއް ކަމަށާ ނަމަވެސް އިންތިހާބު ކާމިޔާބުވުމުން އެއަޑު އެމީހުންގެ އަރުތެރެއިން ކެނޑިގެން ދިއުމުން އެމީހުންގެ އިހްލާސްތެރިކަން ހުރި މިންވަރު ހާމަވެގެން ހިނގައްޖެ ކަމަށެވެ.

ރާއްޖޭގެ ޖުޑީޝިއަރީ އޮތީ މިނިވަންވެފައިކަމަށް ރައީސް ޑރ. މުހައްމަދު މުއިއްޒު ވިދާޅުވާ ވިދާޅުވުމަކީ "ހޮޅި" ވާހަކަފުޅެއް ކަމަށް ވިދާޅުވެ ޝިފާގު ވިދާޅުވީ އެހެންނަމަ ރައީސް މުއިއްޒު ޖޭއެސްސީއަށް އައްޔަން ކުރައްވާފައި އިންނނެވި އެމަނިކުފާނުގެ އެޓާނީ ޖެނެރަލް ރައީސް ޔާމީނަށް އިންސާފު ހޯދައިދީ މައްސަލަ އަވަސްކުރުމަށް މަސައްކަތްކުރެއްވީސް ކަމަށެވެ.

ނަމަވެސް މިއަދާ ހަމައަށް ވެސް ރައީސް ޔާމީންގެ މައްސަލަ އަވަސްކުރުމަށް އޭޖީ އުޝާމް ބާރަށް ކިނބިއްސެއްވެސް އެޅުއްވިތޯ އައްސަވާ ޝިފާގުވަނީ މަޖާޒީ ގޮތަކަށް އުޝާމްއަށާ ރައީސް މުއިއްޒަށްވެސް ފާޑު ވިދާޅުވެފައެވެ.

ޝިފާގު ވިދާޅުވީ، މިހާރު އަނެއްކާވެސް ރައީސް ޔާމީންގެ ނަންފުޅާ އެމަނިކުފާނަށް އިންސާފު ލިބެން ޖެހޭ ވާހަކަ ޕޯޑިއަމްތަކުގައި ރައީސް މުއިއްޒު ދައްކަވަން ފައްޓަވައިފިކަމަށާ ފަހަތުގައި އޮތީ މަޖިލިސް އިންތިހާބަށް ޖަހާ މަކަރުވެރި މަޅިއެއް ކަމަށެވެ.

އެހެންކަމުން އެ މަޅީގައި ރައްޔިތުން ނުޖެހި މަޖިލިސް އިންތިހާޞުގައި ރައީސް ޔާމީންގެ ކެންޑިޑޭޓުންނަށް ވޯޓު ދިނުމަށް ޝިފާގު ވަނީ ގޮވާލައްވާފައެވެ.