ޖުޑީޝަލް ސާވިސް ކޮމިޝަން (ޖޭއެސްސީ) ގައި ރައީސުލްޖުމްހޫރިއްޔާގެ މެމްބަރުގެ ގޮތުގައި އިންނަވާ ޔަޒްމީދު މުހައްމަދު އެ ކޮމިޝަނުގެ ނައިބު ރައީސްކަމުގެ މަގާމުން އިސްތިއުފާ ދެއްވައިފިއެވެ. ޔަޒްމީދު މި މަގާމުން އިސްތިއުފާ ދެއްވިކަން ކަށަވަރުވެފައިވީ ނަމަވެސް، އޭނާ އިސްތިއުފާ ދެއްވި ވަކި ސަބަބެއް އަދި ހާމަކުރައްވާފައެއް ނުވެއެވެ.
ޔަޒްމީދު ޖޭއެސްސީގެ ނައިބު ރައީސްކަމަށް އައްޔަންކުރެވުނީ މިދިޔަ އަހަރުގެ އޮކްޓޫބަރު މަހުގެ ތެރޭގައެވެ. އެއީ އެ މަގާމުގައި ކުރިން ހުންނެވި ހައިކޯޓުގެ ފަނޑިޔާރު މުހައްމަދު ނިޔާޒު އިސްތިއުފާ ދެއްވުމާ ގުޅިގެންނެވެ. ޔަޒްމީދަކީ މިދިޔަ ރައްޔިތުންގެ މަޖިލިސް އިންތިހާބުގައި ޕީޕީއެމް/ޕީއެންސީގެ ޓިކެޓުގައި ވާދަކުރެއްވި ބޭފުޅެއްގެ އިތުރުން، ރައީސް ޔާމީންގެ ވެރިކަމުގައި އޭސީސީގެ މެމްބަރުކަން ވެސް ކުރައްވާފައިވާ ބޭފުޅެކެވެ.
ޖޭއެސްސީގައި ރައީސުލްޖުމްހޫރިއްޔާގެ މެމްބަރުގެ ގޮތުގައި ޔަޒްމީދު އައްޔަންކުރެއްވީ މިދިޔަ އަހަރުގެ ފެބްރުއަރީ މަހުގައެވެ. އެއީ އެ މަގާމުގައި ކުރިން ހުންނެވި ތަޖުރިބާކާރު ގާނޫނީ ވަކީލު މުހައްމަދު ސަމީރު އެ މަގާމުން ވަކިކުރެއްވުމަށްފަހުގައެވެ. ޔަޒްމީދަކީ ސިޔާސީ ދާއިރާގައި ހަރަކާތްތެރިވި ބޭފުޅަކަށް ވީނަމަވެސް، އޭނާއަކީ ޝަރުއީ ދާއިރާގެ ތަޖުރިބާ ލިބިވަޑައިގެންފައިވާ ބޭފުޅެއް ނޫންކަން ފާހަގަކޮށްލެވެއެވެ.
ސަރުކާރުގެ އެކި މަގާމުތަކަށް މީހުން އައްޔަންކުރުމާއި ވަކިކުރުމުގެ ސިލްސިލާގެ ތެރެއިން، ޖޭއެސްސީގެ ނައިބު ރައީސްކަމުން ޔަޒްމީދު މި އިސްތިއުފާ ދެއްވީ ކޮމިޝަނުގެ މަސައްކަތްތަކަށް ބަދަލުތަކެއް އަންނަމުންދާ ދަނޑިވަޅެއްގައެވެ. ޔަޒްމީދު ނައިބު ރައީސްކަމުން އިސްތިއުފާ ދެއްވި ނަމަވެސް، ކޮމިޝަނުގެ މެމްބަރުކަމުން ވަކިވިކަމެއް އަދި ސާފެއް ނުވެއެވެ.
