އެމެރިކާގެ ރައީސް ޑޮނަލްޑް ޓްރަމްޕް އީރާނުގެ ވެރި ރަށް ތެހެރާނުން ދޫކޮށްލާއި ފައިބައިގެން ދިއުމަށް ގޮވާލެއްވުމާ ގުޅިގެން ތެލުގެ އަގު ދެ ޕަސެންޓަށް ވުރެ މައްޗަށް ގޮސްފައިވާއިރު، ސަރަހައްދީ ހަމަނުޖެހުން ބޮޑުވެ، ތެލުގެ ސަޕްލައިއަށް ބުރޫ އަރާފާނެ ކަމުގެ ބިރު ވަނީ އިތުރުވެފައެވެ.

ބްލޫމްބާގް ނިއުސް އިން ބުނާ ގޮތުގައި ބްރެންޓް ކްރޫޑުން 1.17 ޑޮލަރު ނުވަތަ 1.6 ޕަސެންޓް މައްޗަށް ގޮސް ފީފާއެއްގެ އަގު 74.40 ޑޮލަރަށް އަރާފައިވެ އެވެ.

މީގެ އިތުރުން އެމެރިކާގެ ވެސްޓް ޓެކްސަސް އިންޓަމީޑިއަޓް ކްރޫޑްގެ ފީފާއެއް 1.34 ޑޮލަރު ނުވަތަ 1.87 ޕަސެންޓް މައްޗަށް ގޮސް 73.11 ޑޮލަރަށް އަރާފައިވެ އެވެ.

އީރާނަކީ ދުނިޔޭގައި އެންމެ ގިނައިން ކްރޫޑް އުފައްދާ އަދި އެކްސްޕޯޓްކުރާ އެއް ޤައުމު ކަމުން ސަހްޔޫނީންގެ ހަމަލާތަކުގެ ސަބަބުން ދުނިޔޭގެ ސަޕްލައި އަށް އަސަރު ކުރާނެތީ ކަންބޮޑުވުންތަކެއް ވަނީ އުފެދިފައެވެ.

މީގެ ސަބަބުން ރާއްޖޭގައި ލިބޭ ތެލުގެ އަގުވެސް އުފުލުން އެކަށީގެންވެއެވެ.