އުރީދޫ އަހަރީ އާންމު ޖަލްސާ އަންނަ މަހު 7ގައި ބާއްވަން އެކުންފުނިން ނިންމައިފިއެވެ.

އޫރީދޫ އިން ބުނީ ޖަލްސާ އޮންނާނީ ހަތް ވަނަ ދުވަހުގެ ރޭ 08:30 ގައި ކަމަށެވެ. ޖަލްސާގައި އޮންލައިންކޮށް ނުވަތަ ޖަލްސާ ބާއްވާ ތަންކަމުގައިވާ ހުޅުމާލޭ ސެންޓްރަލް ޕާކަށް ގޮސްގެންވެސް ބައިވެރިވެވޭނެކަމަށް އުރީދޫ އިން ބުންޏެވެ.

ސެންޓްރަލް ޕާކަށް ގޮސްގެން ޖަލްސާގައި ބައިވެރިވުމުގެ ފުރުސަތު ލިބެނީ 200 ހިއްސާދާރުންނަށެވެ. އަދި އޮންލައިން ކޮށް 'ފަހި ވޯޓު' ބޭނުންކޮށްގެން ޖަލްސާގައި ބައިވެރިވުމުގެ އިންތިޒާމު ހަމަޖައްސައިދޭނެއެވެ.

ސެންޓްރަލް ޕާކަށް ހާޒިރުވެ ޖަލްސާގައި ބައިވެރިވާ ހިއްސާދާރުން ޖަލްސާ ބޭއްވުމަށް ހަމަޖެހިފައިވާ ދުވަހުގެ ރޭ 7:30 އާއި 08:30 އާ ދެމެދު އެތަނަށް ހާޒިރުވި ރަޖިސްޓްރީ ކުރަން ޖެހެއެވެ. ރަޖިސްޓްރީ ކުރަން ދާއިރު ދިވެހި ރައްޔިތެއްކަން އަންގައިދޭ ކާޑު ނުވަތަ ޕާސްޕޯޓް ހިފައިގެން ދިއުމަށް އުރީދޫ އިން ވިދާޅުވެއެވެ.

އުރީދޫއިން ބުނިގޮތުގައި މި ޖަލްސާގައި ބައިވެރިވެވޭނީ އަންނަ މަހުގެ ފަސް ވަނަ ދުވަހުގެ ކުރިން ރަޖިސްޓްރީ ވާ ހިއްސާދާރުންނަށް އެކަންޏެވެ. ރަޖިސްޓަރީ ކުރުމަށް އެމްއެސްޑީ އޮންލައިން ސިސްޓަމް "އިންފިނިޓީ" މެދުވެރިކޮށް ނުވަތަ ފޯމް ހުށަހަޅައިގެން ރަޖީސްޓްރީ ކުރެވޭނެއެވެ.

ފޯމު ހުށަހަޅާ މީހުން އަންނަ މަހުގެ ފަސް ވަނަ ދުވަހުގެ ރޭ 08:30 ގެ ކުރިން [email protected] އަށް މެއިލްކުރުމަށް އެ ކުންފުނިން އެދެއެވެ. އަދި އުރީދޫ މޯލްޑިވްސްގެ ހެޑްކުއާޓާއަށް ފޯމްތައް ހުށަހެޅޭނެ ކަމަށް ވެސް ބުންޏެވެ.

އުރީދޫ މޯލްޑިވްސް އަހަރީ އާންމު ޖަލްސާގައި އޮންލައިންކޮށް ބައިވެރިވާ ހިއްސާދާރުން އަދި ޕުރޮކްސީ ހޯލްޑަރުން ޖަލްސާ ބޭއްވުމަށް ހަމަޖެހިފައިވާ ދުވަހުގެ ރޭގަނޑު 08:15 އާއި 08:30 އާ ދެމެދު، ލިބިފައިވާ ލޮގިން މައުލޫމާތު ބޭނުންކޮށްގެން ފަހި ވޯޓް ސިސްޓަމަށް ލޮގިން ކުރުމަށް އުރީދޫއިން އެދެއެވެ.