އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ހުށަހެޅި 'ބިގް ބިއުޓިފުލް ބިލް' ހަނި އަގުލަބިޔަތަކުން ސެނެޓުން ފާސްކޮށްފި އެވެ.
އެމެރިކާގެ ކޮންގްރެސްގެ ދަށު ގެއިން ބުރާސްފަތި ދުވަހު ނެގި އެ ވޯޓުގައި އެ ބިލާ އެއްކޮޅަށް 218 މެމްބަރުން ވޯޓު ދެއްވާފައިވާއިރު، ދެކޮޅަށް ވޯޓު ދެއްވާފައި ވަނީ 214 މެމްބަރުންނެވެ.
ރައްޔިތުންގެ މަޖިލީހުގެ ޑިމޮކްރެޓިކް ޕާޓީގެ 212 މެންބަރުން ވެސް ވަނީ އެ ބިލާ ދެކޮޅު ހައްދަވާފައެވެ. އެ މެމްބަރުންނާއެކު ރިޕަބްލިކަން ޕާޓީގެ މެޖޯރިޓީން ވަކިވެވަޑައިގަތީ ކެންޓަކީގެ މަންދޫބުން ކަމަށްވާ ތޯމަސް މެސީ އާއި ޕެންސިލްވޭނިއާގެ ބްރައިއަން ފިޓްސްޕެޓްރިކްއެވެ.
ކޮންގްރެސްގެ ކޮންޓްރޯލް އޮންނަނީ ރިޕަބްލިކަން ޕާޓީއަށެވެ. އެ ބިލުގެ ފައިނަލް ނިންމުން ނިންމައި އެ ބިލްގައި ޓްރަމްޕް ސޮއި ކުރެއްވީ އެމެރިކާގެ މިނިވަން ދުވަހާއި ދިމާކޮށް އިއްޔެ އެވެ.
ޑިމޮކްރެޓިކް ޕާޓީގެ ގާނޫނު ހަދާ މަޖިލީހުގެ މެމްބަރުން ވަނީ އެ ބިލުގައި ވާ ގޮތަށް ޓެކްސް ކުޑަކުރުމުން މައިގަނޑު ގޮތެއްގައި ފައިދާ ކުރާނީ އެންމެ މުއްސަނދިންނަށް ކަމަށް ބުނެ ވަރަށް ބޮޑަށް ފާޑުކިޔާފައެވެ.
ނަމަވެސް ވެރިކަންކުރާ ރިޕަބްލިކަން ޕާޓީއަށް ތާއީދުކުރާ މީހުން ބުނާ ގޮތުގައި ބިލުގެ ސަބަބުން އިގްތިސާދީ ގޮތުން ކުރިއަރައި، މެޑިކެއިޑް ފަދަ ޕްރޮގްރާމްތަކުގައި އިސްރާފުކުރުމާއި ހަދާ މަކަރާއި ހީލަތް ކުޑަކުރެވޭނެއެވެ.
