އއ. މާޅޮހުގައި މިމަހު 13 ވަނަދުވަހު ނިދާފައި އޮތްވައި އަނިޔާވެރި ގޮތަކަށް މަރައިލި އަބްދުއްރަހްމާން އާދަމް، 65، ގެ މަރުގެ މައްސަލައިގައި ފުލުހުން ހިންގާ ތަހުގީގަށް އެއް ދުވަސް ފާއިތުވެގެން ދިޔައިރު ވެސް އެއްވެސް މައުލޫމާތެއް ހާމަނުކުރާތީ އެރަށުގެ ރައްޔިތުން ކަންބޮޑުވުން ފާޅުކުރަން ފަށައިފި އެވެ.

އަބްދުއްރަހްމާން މަރުވެފައި ވަނީ ނިދާފައި އޮތްވައި މީހަކު އޭނާގެ ބޮލަށް ދިން އަނިޔާވެރި ހަމަލާގެ ސަބަބުންނެވެ.

މަރާ ގުޅިގެން މި ރަށު ރައްޔިތުން ތުހުމަތު ކުރާ އެއްވެސް މީހަކު ނެތް ނަމަވެޗް މަރާ ގުޅޭގޮތުން ކޮންމެވެސް ވަރެއްގެ މައުލޫމާތެއް ފުލުހުން ހާމަކުރަން ޖެހޭ ކަމަށް އެރަށުގެ ރައްޔިތުން ބުނެފައި ވެއެވެ.

މައުލޫމާތު ލިބިފައިވާ ގޮތުގައި މި މައްސަލައާއި ގުޅިގެން މިހާތަނަށް އެއްވެސް މީހަކު ހައްޔަރު ކޮށްފައި ނުވެއެވެ.

އަބްދުއްރަހްމާނުގެ ހަށިގަނޑުގެ އިތުރު ތަހުލީލުތައް ހެދުމަށް އިއްޔެ ހަވީރު ވަނީ މާލެ ގެންގޮސްފަ އެވެ. މީގެ އިތުރުން އޮޓޮޕްސީ ހެދުމަށް ރާއްޖެއިން ބޭރަށް ފޮނުވުމަށް ކުރަންޖެހޭ މަސައްކަތްތައް ދަނީ ކުރަމުން ދާ ކަމުގައި ފުލުހުން ހާމަކޮށްފައި ވެއެވެ.