ރައީސް އޮފީސް ވެސް މިހާރު ހިންގަނީ އުނބަށްޖަހާ އުސޫލުން ކަމަށް ރައީސް އަބްދުﷲ ޔާމީން އަބްދުލް ގައްޔޫމް އަލަށް އުފައްދަވާ ޕާޓީ ޕީއެންއެފް އުފެއްދެވުމުގައި އިސްކޮށް ހަރަކާތް ތެރިވާ މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވީ އެމަނިކުފާނު އެކްސްގައި ކުރެއްވި ޕޯސްޓެއްގައެވެ.

މަލީހު ވިދާޅުވީ މި ސަރުކާރުން މިހާރު ރައީސް އޮފީސް ވެސް ހިންގަނީ އުނބަށްޖަހާ އުސޫލުން ކަމަށާއި މީއީ ލަދުވެތި ކަމެއް ކަމަށެވެ.

މީގެ އިތުރުން މަލީހު ވިދާޅުވީ ރައީސް އޮފީހަކީ މިހާރު ޖޯކެއް ކަމަށެވެ. އަދި މި ސަރުކާރުުން މުޅި މުއައްސަސާވެސް ކިލަބު ކޮށްލައިފި ކަމަށް މަލީހު ވަނީ ވިދާޅުވެފައެވެ.

މި ސަރުކާރުގެ އަމަލުތައް ހުންނަ ގޮތުން ގިނަ ރައްޔިތުންވެސް ދަނީ ނުރުހުން ފާޅުކޮށް ފާޑު ކިޔުން އަމާޒު ކުރަމުންނެވެ. އެގޮތުން ބައެއް ބޭފުޅުން ބުނަމުން ދަނީ ރައީސް ޑރ މުއިއްޒު އަށް ވެރިކަން ކުރާކަށް ނޭންގޭ ކަމަށެވެ. މީގެ އިތުރުން ރައްޔިތުން ގާތު ދައްކަވާ ވާހަކަ އާ އަމަލާ ދިމާ ނުވާ ވާހަކަވެސް މިއީ ގިނަ ރައްޔިތުން ހުއްޓުމެއް ނެތި ދައްކަމުން އަންނަ ވާހަކަތަކެވެ.