ދިވެހިރާއްޖޭގެ މިނިވަންކަމަށް 60 އަހަރު ފުރުނު މުނާސަބާއާ ދިމާކޮށް އިންޑިއާ ދިވެހިންނަށް ހިންދެމި ނުލެވޭނެ ވަރަށް ލޯނުދީ ދަރަނިވެރި ކުރުވައިފި ކަމަށް ކުރީގެ ދާޚިލީ ވަޒީރު އުމަރު ނަސީރު ވިދާޅުވެއްޖެއެވެ.
އުމަރު މިފަދައިން ވިދާޅުވީ އޭނާގެ އެކްސްގައި ކުރެއްވި ޕޯސްޓެއްގައެވެ.
އުމަރު ވިދާޅުވީ، ދިވެހިރާއްޖޭގެ މިނިވަންކަމަށް 60 އަހަރު ފުރުނުއިރު އިންޑިޔާ އަސްކަރިއްޔާގެ 3 އުޅަނދެއް، އެމީހުންގެ މީހުންނާއެކު ވަނީ ރާއްޖޭގައި ގާއިމްކޮށްފައި ކަމަށެވެ. އަދި އެކަން ދެމެހެއްޓުމަށްޓަކައި ރާއްޖެއަށް ހިންދެމި ނުލެވޭ ވަރަށް އިންޑިއާއިން ލޯނުދީފައިވާކަން ފާހަގަކުރައްވާ އުމަރު ވިދާޅުވީ އެއީ މިނިވަންކަމަށް އޮތްނުރައްކަލެއް ކަމަށެވެ.
އުމަރު މިފަދައިން ވިދާޅުވެފައިވާއިރު، ތަރައްގީގެ މަޝްރޫއުތަކަށް ބޭނުންވާ 565 މިލިއަން ޑޮލަރު (8.7 ބިލިއަން ރުފިޔާ) ގެ ލައިން އޮފް ކްރެޑިޓު (އެލްއޯސީ) އެއް ކުރިން ހުރި އެލްއޯސީތަކުގެ އިތުރުން އިންޑިއާ ސަރުކާރުން ދިވެހި ސަރުކާރަށް ހަމަ ޖައްސާފައި ދީފައިވެއެވެ.
މިހާރުވެސް ދިވެހިރާއްޖެއަށް ދަރަނި ނުދެއްކި ޑީފޯލްޓަކާ ދިމާއަށް ގައުމު މިސްރާބު ޖަހާފާނެކަމުގެ ހިރާސް ބޮޑުވެ ދުނިޔޭގެ މާލީ އިދާރާތަކުން ރާއްޖޭގެ ކްރެޑިޓު ރޭޓިން ދަށްކޮށް ވަނީ ހިފަހައްޓާފައެވެ.
