ޕޯޗުގަލްެއިންވެސް ފަލަސްތީން ވަކި ދައުލަތެއްގެ ގޮތުގައި ބަލައިގަންނަން މަޝްވަރާ ކުރަމުންދާ ކަމަށް އެ ޤައުމުގެ ބޮޑުވަޒީރު، ލުއީސް މޮންޓެނެގްރޯ ވިދާޅުވެއްޖެއެވެ.
ލުއީސް ވިދާޅުވީ ފަލަސްޠީނަކީ މިނިވަން ދައުލަތެއްގެ ގޮތުގައި ބަލައިގަތުމާ ގުޅޭގޮތުން ޕޯޗުގަލްގެ ސަރުކާރުން އެ ޤައުމުގެ މައި ސިޔާސީ ޕާޓީތަކާއި އެ ޤައުމުގެ ރައީސް މާސެލޯ ރެބެލޯ ޑީ ސޫސައާ މަޝްވަރާތައް ކުރިއަށް ގެންދިޔުމަށް ނިންމަވާފައިވާ ކަމަށެވެ.
މިދިޔަ ހަފްތާގެ ތެރޭގައި ފަރަންސޭސިވިލާތުގެ ރައީސް އެމަނުއަލް މެޚްރޮން ވެސް ވަނީ ކުރިއަށް އޮތް ސެޕްޓެމްބަރު މަހުގެ ތެރޭގައި ފަލަސްޠީނަކީ މިނިވަން ދައުލަތެއްގެ ގޮތުގައި އެ ޤައުމުން ބަލައިގަންނާނެ ކަމަށް އިޢުލާނުކުރައްވައިފައެވެ. އެއާއެކު އެ ޤައުމު ވެގެންދާނީ ހުޅަނގުގެ ބޮޑެތި ޤައުމުތަކުގެ ތެރެއިން ފަލަސްޠީނުގެ މިނިވަންކަން ބަލައިގަންނަ ފުރަތަމަ ޤައުމަށެވެ.
އިނގިރޭސިވިލާތާއި ކެނެޑާޢިން ވެސް މިހާރު ވަނީ ފަަލަސްޠީނަކީ މިނިވަން ދައުލަތެއްގެ ގޮތުގައި ބަލައިގަތުމާމެދު އެ ޤައުމުތަކުން ވިސްނަމުންދާ ކަމަށް ބުނެފައެވެ.
އދގެ އާންމު މަޖިލީހުން ފަލަސްޠީނަކީ މިނިވަން ދައުލަތެއްގެ ގޮތުގައި ނުަރަސްމީކޮށް ބަލައިގަތީ 2012ވަނަ އަހަރުގެ ނޮވެމްބަރު މަހުގެ ތެރޭގައެވެ. އެއީ އެ މަޖިލީހުގައި ފަލަސްޠީނަށް ދީފައިވާ އޮބްސާވަރެއްގެ ދަރަޖައިން ފުރިހަމަ މެންބަރަކަށް ނުވާ ދައުލަތެެއްގެ ދަރަޖައަށް މަތިކުރުމުންނެވެ.
