ކުޅުދުއްފުށި ސިޓީ ޒޯން ސްޓޭޑިއަމްގެ ފާހާނާ ތެރޭގައި މަރުވެފައި އޮތް މީހަކު ފެނިއްޖެ އެވެ.

ފުލުހުން ބުނީ، މިއަދު ފަތިހު 5:00 ހާއިރު ގެއިން ނުކުމެެގެން ދުވަން ދިޔަ ފަހުން ގެއްލިގެން ހޯދަން ފެށީ އެ ރަށު ޖިފުޑި، 67 އަހަރުގެ ހަސަން މޫސާ ކަމަށެވެ.

އެ މީހާގެ ހަބަރެއް ނުވެގެން ފުލުހުންނަށް ރިޕޯޓްކުރީ ހެނދުނު 10:30 ހާއިރު ކަމަށް ފުލުހުން ބުނެފައިވެއެވެ.

ފުލުހުން ބުނީ ހަސަން ހޯދަމުން ދަނިކޮށް، ކުޅުދުއްފުށީ ޒޯން ސްޓޭޑިއަމްގެ ފާޚާނާ ތެރޭގައި ވެއްޓިފައި އޮއްވައި ފެނިގެން ހޮސްޕިޓަލަށް ގެންދިޔަ ކަމަށާއި ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށެވެ.

ނަމަވެސް އެ މީހާގެ ހަށިގަނޑުގެ ބޭރުފުށުން އެއްވެސް އަނިޔާއެއް ފެންނަން ނެތް ކަމަށް ހޮސްޕިޓަލާ ހަވާލާދީ ފުލުހުން ބުންޏެވެ.

ފުލުހުން އަންނަނީ އެ މައްސަލަ ތަހުގީގު ކުރަމުންނެވެ.