ސަޕްލައި ދޯންޏެއް ބަންޑުން ޖަހާލާ ދިވެއްސަކު ނިޔާވެއްޖެއެވެ.

ދިވެއްސަކު ނިޔާވެފައިވަނީ ހދ. ކުމުންދޫ ކައިރިން ދަތުރުކުރި ސަޕްލައި ދޯންޏެއް ބަންޑުން ޖަހާލި ހާދިސާގައި ކަމަށް ދިވެހި ފުލުހުން ހާމަކޮށްފައިވެއެވެ.

ފުލުހުން ބުނީ މިއަދު ހެނދުނު 8:55 ހާއިރު ރިޕޯޓް ލިބުނު އެ ހާދިސާގައި ސަޕްލައި ދޯނިން ދަތުރުކުރި ހަތަރު މީހުން ސަލާމަތްކޮށް، އޭގެ ތެރެއިން ދިވެހި މީހާގެ ހާލު ދެރަވެގެން ކުޅުދުއްފުށި ރީޖަނަލް ހޮސްޕިޓަލުގައި ފަރުވާ ދެމުން ދަނިކޮށް ހެނދުނު 10:30 ހާއިރު މަރުވެފައިވާ ކަމަށެވެ.

ފަރުވާ ދެމުން ދަނިކޮށް މަރުވީ 66 އަހަރުގެ ދިވެހި ފިރިހެނެއް ކަމަށް ފުލުހުން ބުންޏެވެ.

ހދ. ކުޅުދުއްފުށިން ށ. ފުނަދޫއަށް ދަތުރުކުރި އެ ސަޕްލައި ދޯނިން ދަތުރުކުރި ހަތަރު މީހުންގެ ތެރޭގައި ހިމެނެނީ ދެ ދިވެހިންނާއި ދެ ބިދޭސީންނެވެ. ދޯނި ބަންޑުން ޖަހާލި ހާދިސާ ފުލުހުން ގެންދަނީ ތަހުގީގު ކުރަމުންނެވެ.

މި ހާދިސާ މިއަދު ހނގާފައިވާއިރު، ރޭ ކ. ޒަމާނީ އައިލެންޑް ކައިރިން ދަތުރުކުރި 17 މީހުންނާއެކު ދަތުރުކުރި ޑިންގީއެއް ބަންޑުން ޖަހާލައި ކަނޑުވި ބަޔަކު ވެސް ފުލުހުން ވަނީ ސަލާމަތްކޮށްފައެވެ. އެއީ ހުސް ބިދޭސީން ދަތުރުކުރި ޑިންގީއެކެވެ.