ތިންބާރު ވަކިވެ އެއް ބާރުން އަނެއް ބާރަށް ފާރަވެރިވާން އޮންނަ ވެރިކަމުގެ ނިޒާމެއްގެ ތެރެއިން ވެރިކަން ހިނގަމުން އަންނައިރު، ޖުޑިޝިއަީގެ އެންމެ މަތީ ކޯޓު، ސުޕްރީމު ކޯޓުން، ވެރިކަން ކުރުމުގެ ބާރު، ރައީސުލްޖުމްހޫރިއްޔާއަށް ސަނާ ތައުރީފުކުރުމަކީ އަޅުވެތިވުމުގެ މިސާލެއް ކަމަށް ސިފަކޮށްފިއެވެ.

މިފަދައިން ގިނަ ބަޔަކު އެކަން ސިފަކޮށްފައިވަނީ، އަންނަ އަހަރުން ފެށިގެން ދައުލަތުގެ އާމްދަނީން ވަކި ޕަސަންޓެއް ކަނޑައަޅާ، އެފައިސާ ކަނޑައެޅޭ ވަކި އުސޫލެއްގެ ދަށުން ބްލޮކް ގްރާންޓުގެ ގޮތުގައި ދޫކުރުމަށް ސަރުކާރުން ނިންމުމުން އެކަމާ ގުޅިގެން ސުޕްރީމް ކޯޓުން ރައީސް މުހައްމަދު މުއިއްޒަށް ސަނާކިޔުމާ ގުޅިގެންނެވެ.

އެކަމަށް ފާޑުކިޔާ މީސް މީޑިޔާގައި މީގެ ކުރިން ސުޕްރީމު ކޯޓުގައާ ޖުޑިޝިއަރީގައި މަސައްކަތްކޮށްފައިވާ އެކި އެކި ފަރާތްތަކުންނާ ގާނޫނީ ވަކީލުންވެސް ވަނީ ފާޑުކިޔާފައެވެ.

އެގޮތުން ދިވެހި ރާއްޖޭގެ އެންމެ މަތީ ކޯޓު، ސުޕްރީމް ކޯޓުން އެކްސްގައި ކުރި ޕޯސްޓެއްގައި ބުނީ ރާއްޖޭގެ ޖުޑިޝަރީ ހަރުދަނާކުރައްވައި، މިނިވަން ޖުޑިޝަރީއެއް ޤާއިމުކުރެއްވުމަށް، މުއިއްޒު އަޅުއްވާ މުހިންމު ފިޔަވަޅެއްގެ ގޮތުން ދައުލަތުގެ އާމްދަނީގެ ވަކި އިންސައްތައެއް ޖުޑިޝަރީގެ ބަޖެޓުގައި ހިމެނުމަށް ނިންމީތީ ޝުކުރު އަދާކުރުމަކީ "އަންއެތިކަލް" ކަމެއްގެ ގޮތުގައި ސުޕްރީމު ކޯޓުގެ ކުރީގެ ފަނޑިޔާރު ހުސްނުއް ސުއޫދު ވަނީ ވިދާޅުވެފައެވެ.

ހުސްނުއްސުއޫދު ވަނީ ޝަރުއީ މުއާމަލާތްތައް ކުރަންވާނީ، ޝަރުއީ ނިޒާމުގެ ނަޒާހަތްތެރިކަމަށް ބުރޫއަރާފަދަ އާންމު މަޝްވަރާތަކުގެ ބަދަލުގައި، އެކަށީގެންވާ ގޮތްތަކުން ކަމަށް ވެސް ވިދާޅުވެފައެވެ.

ބައެއް އާންމުން ބުނީ ސުޕްރީމް ކޯޓުގެ ޕޯސްޓުން ދޭހަވީ ޖުޑީޝަރީގެ މިނިވަންކަން ނެތް މިންވަރު ކަމަށާއި އޭގެ ސަބަބުން އާންމުން ޖުޑިޝަރީއަށް ކުރާ އިތުބާރު ވެސް ކުޑަވާނެ ކަމަށެވެ.

މީގެ އިތުރުން ގާނޫނީ ވަކީލު އަދި ރައްޔިތުންގެ މަޖިލީހުގެ ކުރިގެ މެމްބަރު އިމްތިޔާޒު ފަހުމީވެސް ވަނީ މިކަމަށް ފާޑުވިދާޅުވެފައެވެ. އިންތި ވިދާޅުވި ގޮތުގައި، ސަރުކާރުގެ އެ ނިންމެވުން ނިންމެވިކަން ފާހަގަކުރެއްވުމަކުން ގޯހެއް ނެތް ކަމަށާ ނަމަވެސް "އުފާކުރައްވައި" "މަރުޙަބާ ދަންނަވައި" "ރައީސަށް ޝުކުރުދެންނެވުން ފަދަ ބަސްފުޅުތަކުން ސްޕްރީމް ކޯޓުން ޓްވީޓްކުރެއްވުމަކީ ޖުޑިޝަލް އެތިކްސް އާ ފުށުއަރާކަމެއް ކަމަށް ދެކޭ ކަމަށެވެ.

މީގެ އިތުރުން ސުޕްރީމު ކޯޓަކީ އެކްޓިވިސްޓުން ތިބި ތަނެއްގެ ގޮތުގައިވެސް އާންމު ރައްޔިތުން ވަނީ ސިފަކޮށްފައެވެ. އެންމެ ޕޯސްޓަކުން ސުޕްރީމު ކޯޓުގެ މިނިވަންކަން އޮތް މިންވަރު ހާމަވެއްޖެ ކަމަށްވެސް ވަނީ ބުނެފައެވެ.

ހަމައެހެންމެ ތިން ބާރު ވަކިވެފައިވާ ނިޒާމެއްގެ ތެރެއިން ފެނިގެން ދަނީ ފެނިގެންވާނެ ކަންކަން ނޫން ކަން ފާހަގަކޮށް އިތުރު ރައްޔިތަކު ވަނީ، ތިން ބާރަށް ވެސް ކަނޑައެޅިފައިވާ ފައިސާއަކީ ބަޖެޓަކުން ދޭ އެއްޗަކަށްވެސް ވާން ޖެހޭނެ ކަމަށް ވެސް ބުނެފައެވެ.

ޖުޑިޝިއަރީއަށް ނުފޫޒު ނުފޯރުވާނެ ކަމަށް ރައީސް މުއިއްޒު ވިދާޅުވި ނަމަވެސް އެމަނިކުފާނުގެ އަމަލުތަކުން ހާމަވަނީ ޖުޑިޝިއަރީއަށް އިންތިހާއަށް ނުފޫޒު ފޯރުވާ ކަންކަމަށްވެސް އެތައް ރައްޔިތުންނެއް ވަނީ ސޯޝަލް މީޑިޔާގައި ޚިޔާލުފާޅުކޮށްފައެވެ.