މައްސަލަ ކޯޓަށް ހުށަހެޅުމުގެ މަސައްކަތް ފަށާފައިވަނީ ގާނޫނީ އަލްއުސްތާޛު ވަކީލު އަލީ ހުސައިނެވެ.
އަލީ ހުސައިން އެކްސްގައި ކުރެއްވި ޕޯސްޓެއްގައި ވިދާޅުވީ، މި ވަގުތު ރައްޔިތުންގެ މަޖިލީހުގައި ގޮނޑި ގެއްލިފައިވާ ހައެއްކަ މެންބަރުން އެބަތިބި ކަމަށާއި، އެ މީހުންގެ މައްސަލަ ސުޕްރީމް ކޯޓަށް ހުށަހެޅުމުގެ މަސައްކަތް މިހާރު ފަށާފައިވާ ކަމަށެވެ.
ހަމައެއާއެކު އަލީ ހުސައިން ވިދާޅުވީ، މި މައްސަލަ ހުށަހަޅަނީ އަމިއްލަ ގޮތުން ނުވަތަ މިނިވަން ކެންޑިޑޭޓުންގެ ގޮތުގައި އިންތިޚާބުވުމަށްފަހު، ރައްޔިތުންގެ މަޖިލީހުގެ މެންބަރުކަމުގެ ހުވާ ކުރުމުގެ ކުރިން ނުވަތަ ފަހުން ޕީއެންސީއަށް ސޮއިކުރި މެންބަރުންނާ ގުޅޭގޮތުން ކަމަށެވެ.
އަލީ މިފަދަ މަސައްކަތެއް ފައްޓަވާފައިވާއިރު، މިދިޔަ މަހުގެ 29ގައި ސުޕްރީމް ކޯޓުން ވަނީ ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލުކުރެވޭނެ ހަމައެއް ނެތް ކަމަށް ހުކުމްކޮށްފައެވެ.
