ފަލަސްތީނުގެ ރައީސް މަހްމޫދު އައްބާސް، އދ. ގެ އާންމު މަޖިލީހުގެ އަހަރީ ބައްދަލުވުމުގައި ވީޑިއޯ މެދުވެރިކޮށް ބައިވެރިކުރުމަށް އދ.ގެ އާންމު މަޖިލީހުން ވޯޓު ދީ، ފާސްކޮށްފިއެވެ.
މިފަދައިން އދ. އިން ފާސްކުރީ އެމެރިކާއިން އެމަނިކުފާނަށް ވިސާ ނުދޭން ނިންމުމާ ގުޅިގެންނެވެ.
އދ. ގެ އެ ނިންމުމާއެކު ރައީސް އައްބާސްއަށް ޔޫއެންޖީއޭގެ އާންމު މަޖިލީހަށް ވީޑިއޯ މެދުވެރިކޮށް މުޚާތަބުކުރެއްވުމުގެ މަގު ފަހިވެގެންދާނެއެވެ. މި ގަރާރަށް 145 ޤައުމަކުން ތާއީދުކުރިއިރު، 5 ޤައުމަކުން ވަނީ ދެކޮޅަށް ވޯޓު ދީފައެވެ. އަދި 6 ޤައުމަކުން އެއްވެސް ވަކި އަތަކަށް ވޯޓު ދީފައިނުވެއެވެ.
އޮގަސްޓު މަހުގެ ތެރޭގައި އެމެރިކާއިން ވަނީ ފަލަސްތީން ލިބަރޭޝަން އޯގަނައިޒޭޝަން (ޕީ.އެލް.އޯ) އަދި ފަލަސްތީނުގެ އޮޓޮނޮމަސް އޮތޯރިޓީ (ޕީ.އޭ) ގެ މެންބަރުންނަށް ވިސާ ދިނުން ހުއްޓާލައި، އަދި ދީފައިވާ ވިސާތައް ބާތިލުކޮށްފައެވެ.
އެމެރިކާގެ ހާރިޖީ ވުޒާރާއިން ނެރުނު ބަޔާނެއްގައި ހާމަކޮށްފައިވާ ގޮތުގައި، ޕީ.އެލް.އޯ އާއި ޕީ.އޭ އިން އެމެރިކާއަށް ވެފައިވާ ވައުދުތަކާ އެއްގޮތަށް އަމަލުނުކޮށް، ސުލްހައިގެ މަގަށް ހުރަސްއަޅަމުންދާ ކަމަށެވެ. އަދި މިކަންކަމަށް އެ ދެ ޖަމާއަތް ޖަވާބުދާރީ ކުރުވުމަކީ އެމެރިކާގެ ގައުމީ ސަލާމަތަށްޓަކައި މުހިންމު ކަމެއް ކަމުގައި ޓްރަމްޕްގެ ސަރުކާރުން އަބަދުވެސް ބުނަމުންދާ ކަމަށްވެސް އެ ބަޔާނުގައިވެއެވެ.
އެމެރިކާއިން އެ ފަދަ ނިންމުމެއް ނިންމާފައިވަނީ، އެމެރިކާގެ ބައެއް އެކުވެރި ޤައުމުތަކުން ފަލަސްތީނު ދައުލަތެއްގެ ގޮތުގައި ރަސްމީކޮށް ބަލައިގަތުމަށް ހަމަޖެހިފައިވާ ދަނޑިވަޅެއްގައެވެ.
އާންމު މަޖިލީހުގެ ތަޤްރީރުތައް ފެށުމަށް ހަމަޖެހިފައިވަނީ އަންނަ އަންގާރަ ދުވަހުއެވެ. މީގެ ކުރިން އަންނަ ހޯމަ ދުވަހު، އިސްރާއީލާއި ފަލަސްތީނުގެ މައްސަލައަށް ދެ ދައުލަތުގެ ހައްލެއް ހޯދުމަށް މަގުފަހިކުރުމުގެ ގޮތުން ފްރާންސް އާއި ސައޫދީ އަރަބިއްޔާއިން ބާއްވާ ސަމިޓެއްގައި ދުނިޔޭގެ ލީޑަރުން ބައިވެރިވާނެއެވެ.
