ރައީސް ޑރ މުހައްމަދު މުއިއްޒުގެ ނުރުހުން ނޫސްވެރިންނާއި ނޫސްވެރިންގެ ޖަމްއިއްޔާތަކަށް އަމާޒުކޮށްފިއެވެ.

މުއިއްޒު ވ އަތޮޅަށް މިހާރު ކުރަމުންދާ ދަތުރުފުޅުގައި ފެލިދޫ ރައްޔިތުންނާއި ބައްދަލުކޮށް ރައީސް މުއިއްޒު ވިދާޅުވީ އެމަނިކުފާނާ ދިމާވާ ނޫސްވެރިން އަލަށް އަމަލުކުރަން ފެށި މިނިވަން ނޫސްވެރިކަމާއި ހިޔާލުގައި ތަޅު އެޅުވޭ ގޮތަށް އޮތް ގާނޫނު ނުކިޔާ ކަމަށެވެ.

މި ބައްދަލުވުމުގައި ރައީސް މުއިއްޒަށް އެ ރަށުގެ ލާބައާއި މަންފާއަށް ވާހަކަ ދެއްކުމުގެ ބަދަލުގައި ބޮޑަށް އަލިއަޅުވާލެވުނީ މިހާރު ހޫނުވެފައިވާ މިނިވަން ނޫސްވެރިކަމުގެ ބިލާއި ގުޅޭ ގޮތުންނެވެ.

މީގެ އިތުރުން، މުއިއްޒު ތަކުރާރުކޮށް ވިދާޅުވި އެއް ވާހައަކީ އަލަށް އަމަލުކުރަން ފެށި ގާނޫނުގައި ހަމައެކަނި އޮތީ ދޮގު ހަބަރު ނުލިޔެވޭނެ ވާހަކަ ކަމަށެވެ. އެ ނޫން ވާހަކައެއް ގާނޫނުގައި ނެތް ކަމަށް ވެސް ވިދާޅުވި އެވެ. އެކަން ނޫސްވެރިންނަށް ނޭނގެނީ ގާނޫނު ނުކިޔާތީ ކަމަށް ބުނެ މުއިއްޒު ވަނީ ނޫސްވެރިންނަށް ނުރުހުން ފާޅުކޮށް ފާޑުވިދާޅުވެފައެވެ.

ނަމަވެސް ނޫސްވެރިން ރައީސް މުއިއްޒާ ބައްދަލުކުރަން ދިޔަ ދުވަހު އެމަނިކުފާނު ވަނި އެ ދުވަހާ ހަމައަށްވެސް އެމަނިކުފާނު އެ ބިލުގައި އޮތް އެއްޗެއް ނުކިޔާ ކަމަށަ އެހެންކަމުން ބިލުގައި ހުރި ކަންކަން އެނގިވަޑައިނުގަންނަވާ ކަމަށް ވިދާޅުވެފައެވެ.

ކޮންމެ ތަނަކުން ކޮންމެ ބަޔާނެއް ހުށަހެޅިޔަސް ނިންމުން ބަދަލު ނުކުރާނެ ކަމަށް ވިދާޅުވެ ރައީސް މުއިއްޒު ވަނީ ރައްޔިތުންގެ ޚިޔާލާއި ފިކުރު ގަބޫލުނުކުރާނެ ކަން ސިފަވާ ގޮތަށް ރައްޔިތުންގެ ކުރިމަތީގައި ވާހަކަދައްކާފައެވެ.