މެދުއިރުމަތީގައި މުސްލިމުންނާ ދެކޮޅަށް ހިންގަމުންދާ ލާއިންސާނީ ގަތުލުއާންމުތަކަށް ހިތްވަރުދީ ވާގިވެރިވަމުންދާ އެމެރިކާ ސަރުކާރުގެ މަންދޫބު، ސާޖިއޯ ގޯރއާ ފޮރިން މިނިސްޓަރު ޑރ. އަބްދުﷲ ޚަލީލް ބައްދަލުކުރައްވައިފިއެވެ. މި ބައްދަލުވުމަކީ އިސްލާމީ އުންމަތުގެ ހައްގުގައި ވަކާލާތުކުރާނެ ކަމަށް ބުނެ މި ސަރުކާރުން ވަމުންދާ ވައުދުތަކާ ފުށުއަރާ، ގިނަ ބައެއްގެ ފާޑުކިޔުން އަމާޒުވަމުންދާ ބައްދަލުވުމެކެވެ.
ފޮރިން މިނިސްޓްރީން ހާމަކޮށްފައިވާ ގޮތުގައި، މި ބައްދަލުވުމުގައި ދެ ގައުމުގެ ދެމެދުގައި ސަލާމަތީ އެއްބާރުލުން އިތުރުކުރުމާއި އިގްތިސާދީ ގުޅުންތަކާ ގުޅޭގޮތުން ވަނީ ފުޅާދާއިރާއެއްގައި މަޝްވަރާކޮށްފައެވެ. ނަމަވެސް، މުސްލިމުންގެ ލޭ އޮހޮރުވަމުންދާ ގައުމެއްގެ މަންދޫބަކާ އެކު މިފަދަ ގާތް ގުޅުމެއް ބޭއްވުމަކީ ދިވެހި ރައްޔިތުންގެ އިހުސާސްތަކަށް ބެލުމެއް ނެތް އަމަލެއްގެ ގޮތުގައި އިދިކޮޅު ފަރާތްތަކުން ދަނީ ސިފަކުރަމުންނެވެ. އެމެރިކާގެ މަންދޫބު މި ސަރަހައްދަށް ކުރެއްވި ދަތުރުގައި ރާއްޖޭގެ އިތުރުން ސްރީލަންކާގެ އިސް ވެރިންނާ ބައްދަލުކޮށް، އިންޑޯ-ޕެސިފިކް ސަރަހައްދުގައި އެމެރިކާގެ ބާރުވެރިކަން ދެމެހެއްޓުމަށް ބޭނުންވާ ތާއީދު ހޯދުމަށް ވަނީ މަސައްކަތް ކޮށްފައެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މީގެ ކުރިން ވިދާޅުވެފައިވަނީ މެދުއިރުމަތީގެ ހަނގުރާމައާ ގުޅިގެން އެމެރިކާއާއެކު އެއްވެސް މަޝްވަރާއެއް ނުކުރައްވާނެ ކަމަށެވެ. އަދި އެމެރިކާގެ މަންދޫބު ރާއްޖެއަށް ކުރި ދަތުރުގައި ރައީސާ ބައްދަލުނުކޮށް ފުރައިގެން ދިޔަ ނަމަވެސް، ސަރުކާރުގެ ކެބިނެޓް މިނިސްޓަރަކު އެ މަންދޫބަށް މަރުހަބާ ކިޔައި، ރާއްޖޭގެ ދިފާއީ އަދި އިގްތިސާދީ ދާއިރާއިން ފުރުސަތުތައް ފަހިކޮށްދިނުމަށް މަޝްވަރާކުރުމަކީ ސަރުކާރުގެ "ދެފުށް ފެންނަ" ސިޔާސަތެއް ނެތްކަން ހާމަވާ ކަމެއް ކަމަށް ސިޔާސީ މަސްރަހު ދިރާސާކުރާ ފަރާތްތަކުން ބުނެއެވެ. މި ބައްދަލުވުމުގެ ސަބަބުން، އިސްލާމީ ގައުމުތަކާ އެކު އޮންނަންޖެހޭ ބަދަހި ގުޅުމަށް ވުރެ ބޮޑަށް، ހުޅަނގުގެ ބާރުތަކަށް މި ސަރުކާރުން ދޭ ސަމާލުކަން މިވަނީ ހާމަވެގެން ގޮސްފައެވެ.
