ޣައްޒާގެ އުތުރުގައި ޖަނަވާރަށް ކާންދޭ ކާނާ ބޭނުން ކޮށްގެން ހަދާފައިވާ ޕާން ކައިގެން ޣައްޒާގެ ދެ އަހަރުގެ ކުޑަ ކުއްޖަކު ނިޔާވެއްޖެއެވެ.
ޚާލިދު ކިޔާ އެ ތުއްތު ކުއްޖާގެ އިތުރުން އެހެން ކުދިންވެސް އެ ޕާން ކައިފައިވާ ކަމަށް އެކުދިންގެ އާއިލާއިން ވަނީ ބުނެފައެވެ.
އިސްރާއީލުން ޣައްޒާގައި ކުރަމުންދާާ ހަނގުރާމައިގެ ސަބަބުން މުޅި ޣައްޒާގައި ވަނީ ބަނޑުހައިހޫނުކަން ފެތުރިފައެވެ.
އަދި ހާއްސަކޮށް އިސްރާއީލުން ސުންނާފަތި ކޮށްލާފައިވާ ޣައްޒާގެ އުތުރުގެ އަދި މެދުތެރޭގެ ސަރަހައްދުގެ ހާލަތު ވަކިން ގޯހެވެ.
ޣައްޒާގެ ސިއްހަތާއި ބެހޭ ވުޒާރާގެ ތަރުޖަމާނު އަޝްރަފް އަލް ގުދުރާ ވަނީ ޣައްޒާއަށް ދިމާވެފައިވާ އިންސާނީ ކާރިސާ އިތުރަށް ގޯސްވިޔަ ނުދިނުމަށްޓަކައި ޣައްޒާގެ ހުރިހާ ހިސާބަކަށް ކާނާ އާއި ބޯފެން ފޯރުކޮށްދިނުމަށް ބައިނަލްއަގުވާމީ ޖަމިއްޔާތަކަށް ގޮވާލާފައެވެ.
އޭނާ ބުނެފައިވަނީ އިތުރުވަމުންދާ ބަނޑުހައިހޫނުކަމުގެ ސަބަބުން ކުރިއަށް އޮތް ދުވަސްތަކުގައި ދުނިޔޭގެ ލޯ ކުރިމަތީގައި ޣައްޒާގެ އެތައް ހާސް ރައްޔިތުންނެއްގެ ފުރާނަ ގެއްލިގެން ދިޔުން އެކަށީގެންވާ ކަމަށެވެ.
އިސްރާއީލުން ދަނީ ޣައްޒާއަށް އެހީ ފޯރުކޮށްދޭން އިންސާނީ އެހީދޭ ޖަމިއްޔާ ތަކުން ކުރަމުން އަންނަ މަސައްކަތް ތަކަށްވެސް ހުރަސް އަޅަމުންނެވެ.
