ލ. ގަމުގައި މާރާމާރީ ހިންގި ބަޔަކު ހައްޔަރުކޮށްފިއެވެ.

ފުލުހުން މިއަދު ބުނީ ގަމުގައި ބައެއްގެ މެދުގައި ހިންގި ހަމަނުޖެހުމެއްގައި މާރާމާރީ ހިންގާފައިވާ މައްސަލަ ރޭ ދަންވަރު ފުލުހުންނަށް ރިޕޯޓްކޮށްފައިވާ ކަމަށެވެ.

މި މައްސަލައާ ގުޅިގެން ފަސް މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށްވެސް ފުލުހުން ބުނެފައިވެއެވެ.

އެއީ 29 އަހަރުގެ ތިން ފިރިހެނުންނާއި 35 އަހަރުގެ އަންހެނަކާއި 34 އަހަރުގެ ފިރިހެނެކެވެ. އެ އެންމެންނަކީ ވެސް ދިވެހީން ކަމަށް ފުލުހުން ވަނީ ބުނެފައެވެ.

ފުލުހުން އަންނަނީ މި މައްސަލަ އިތުރަށް ތަހުގީގުކުރަމުންނެވެ.

މިހާރަަކަށް އައިސް ރާއްޖޭގައި މާރާމާރީގެ މައްސަލަތައް ވަނީ އިތުރުވެފައެވެ. ހާއްސަކޮށް މާލޭ ސަރަހައްދުގައި މިފަދަ އެތައް ކަމެއް ހިނގަމުން އަންނާތީ ފުލުހުން އަންނަނީ ހާއްސަ އޮޕަރޭޝަންތައް ކުރިޔަށް ގެންގޮސް އެފަދަ އަމަލުތައް ހިންގާ ފަރާތްތައް ފުލުހުންގެ ބެލުމުގެ ދަށަށް ގެންނަމުންނެވެ.