ސަހްޔޫނީންގެ އަސްކަރިއްޔާއިން ފަލަސްތީނަށް ދެމުން އަންނަ އަނިޔާވެރި ހަމަލާތަކާއި ދެކޮޅަށް ވަކާލާތު ކުރަމުން އައި ކެތެރިން ކޮނޮލީ، އަޔަލޭންޑުގެ ރިޔާސީ އިންތިހާބު ކާމިޔާބުކޮށްފިއެވެ.

ކޮނޮލީ މި އިންތިހާބު ކާމިޔާބުކޮށްފައިވަނީ 43 ދާއިރާއެއްގެ ވޯޓު ގުނުމުގެ މަސައްކަތް ނިމުނުއިރު، 63 އިންސައްތަ ވޯޓު ލިބިގެންނެވެ.

މި އިންތިހާބުގައި ކޮނޮލީއާއި ވާދަކޮށްފައިވަނީ 64 އަހަރުގެ ހީތާ ހަމްފްރީސްއެވެ. އޭނާ ވަނީ ރަސްމީ ނަތީޖާ އިއުލާނު ކުރުމުގެ ކުރިން ނާކާމިޔާބީއާއި ކުރިމަތިލާން ޖެހުނުކަން އިއުލާނުކޮށްފައެވެ.

ކޮނޮލީގެ އަކީ އަބަދުވެސް ފަލަސްތީނުގެ ހައްޤުގައި ބަސް ވިދާޅުވަމުން ގެންދަވާ ކަނބަލެކެވެ. ކޮނޮލީ ވަނީ ސަހްޔޫނީން ފަލަސްތީނުގެ ބިމުގައި ހިންގަނީ ޤަތުލްއާންމެއް ކަމަށް ތަކުރާރުކޮށް ވިދާޅުވެ ސަހްޔޫނީންގެ އަސްކަރީ ސިޔާސަތުތަކަށް ވަރަށް ފާޅުކަން ބޮޑު ގޮތެއްގައި ފާޑުވިދާޅުވެފައެވެ.

ކޮނޮލީގެ މި ސިޔާސަތުގެ ސަބަބުން އޭނާއަށް ކެމްޕޭން ތެރޭގައިވެސް ޒުވާނުންގެ ބޮޑު ތަރުހީބެއް ލިބިގެން ގޮސްފައިވެއެވެ.

މީގެ އިތުރުން، ޑަބްލިންގައި ބޭއްވި ބައްދަލުވުމެއްގައި ކޮނޮލީ ވިދާޅުވީ، އޭނާއަކީ އަޑުއަހައި، އެކަންކަން ބަލައި، ވާހަކަ ދައްކަން ޖެހޭ ވަގުތުތަކުގައި ވާހަކަ ދައްކަވާނެ މީހެއް ކަމަށެވެ.

އަޔަލޭންޑުގެ 10 ވަނަ ރައީސްއަކަށް އޭނާ އިންތިހާބުވެފައިވާއިރު، އޭނާއަކީ އެގައުމުގެ ރައީސާކަން ކުރާ 3 ވަނަ އަންހެން މީހާއެވެ.