ނިއުޔޯކްގެ މޭޔަރުކަމުގެ އިންތިޚާބު ކާމިޔާބު ކުރެއްވި ޒޮހްރާން މަމްދާނީ އެ އިންތިޚާބު ކާމިޔާބު ކުރުމާއި އެކު ނިއުޔޯކަށް ދެން ނުދާނެ ކަމަށް ސަހްޔޫނީންގެ ބޮޑު ވަޒީރު ބެންޖަމިން ނަތަންޔާހޫ ބުނެފިއެވެ.

މަމްދާނީ މޭޔަރު ކަމުގެ ކެމްޕޭން ތެރޭގައި އެމެރިކާގެ ރައީސް ޑޮނާލްޑް ޓްރަމްޕްގެ އިންޒާރުތަކާއި ފާޑުކިޔުންތައް އަމާޒުވެފައިވެއެވެ. ސަހްޔޫނީންނަކީ އެމެރިކާގެ އެއް އަތް ކަމަށްވާއިރު ޓްރަމްޕާއި އެއްބައިވެ ނަތަންޔާހޫވެސް ވަނީ މަމްދާނީއަށް ދަތިކުރުމުގެ ފިޔަވަޅުތައް އަޅާނެ ކަމަށް ބުނެ އިންޒާރުދީފައެވެ.

ނަތަންޔާހޫ މިފަދައިން ބުނުމުން މިއީ ނިއުޔޯކަށް ލެއްވި ރަހުމަތެއް ކަމަށާއި  މަމްދާނީ މުޅި ދުނިޔޭގެ ރައީސް ކަމަށްވެސް ހޮވަން ޖެހޭނެ ކަމަށް ބުނެ ގިނަ ބަޔަކު އަންނަނީ ނަތަންޔާހޫއަށް މަލާމާތުގެ ބަސްތައް ރައްދު ކުރަމުންނެވެ.

މަމްދާނީ ވަނީ ބޮޑު މެޖޯރިޓީއާއި އެކު އިންތިޚާބު ކާމިޔާބުކޮށް ނިއުޔޯކްގެ ފުރަތަމަ މުސްލިމް މޭޔަރުކަމުގެ މަގާމުވެސް ހޯދާފައެވެ. މަމްދާނީގެ ކާމިޔާބީގެ ޖަލްސާގައިވެސް އޭނާ ވަނީ ތަކުރާރުކޮށް އޭނާއަކީ މުސްލިމެއްކަން ފާހަގަކޮށް ހަމަހަމަކަމާއި ރައްކާތެރި ތަނަކަށް ނިއުޔޯކް ހަދާނެ ކަމަށް ބުނެފައެވެ.

އަދި މި ސްޕީޗްގައި ޓްރަމްޕަށް ވެސް ބޮޑެތި ފާޑުކިޔުންތަކާއި އެކު ވަރުގަދަ ރައްދެއްވެސް ދީފައެވެ.

މަމްދާނީއަކީ ޔުގެންޑާގެ ކަމްޕާލާއަށް އުފަންވެވަޑައިގެންނެވި ބޭފުޅެކެވެ. އޭނާގެ އާއިލާ ނިޔު ޔޯކަށް ބަދަލުވެވަޑައިގެންނެވީ އުމުރުން ހަތް އަހަރުގައެވެ. މަމްދާނީއަކީ ޔުގެންޑާގެ އިލްމުވެރިޔާ މަހްމޫދު މަމްދާނީ އާއި އިންޑިއާގެ ފިލްމު ޑައިރެކްޓަރު މީރާ ނާޔަރުގެ ފިރިހެން ދަރިކަލުންނެވެ.