1445 ވަނަ އަހަރުގެ ރަމަޟާން މަހު، ސައުދީ އަރަބިޔާގެ އެއްވެސް މިސްކިތެއްގައި ރޯދަވީއްލުން ނުބާއްވާނެކަން ހާމަކޮށްފިއެވެ.

ސައުދީގެ މިނިސްޓްރީ އޮފް އިސްލާމިކް އެފެއާޒް އިން ބުނީ މިއަހަރު މިސްކިތުގައި ރޯދަވީއްލުން ނުބޭއްވުމަށް ނިންމި އެންމެ ބޮޑު ސަބަބަކީ މިސްކިތްތައް ސާފުތާހިރުކޮށް ބެހެއްޓުންކަމަށެވެ. އެހެންކަމުން އެ ގައުމުގެ ކަމާއި ބެހޭ އިދާރާތަކުން ވަނީ، މީހުން އަތުން ފައިސާ ނަގައިގެން މިސްކިތުގައި ރޯދަ ވީއްލުމުގެ އިންތިޒާމުތައް މިއަހަރު ކުރިއަށް ނުގެންދިއުމަށް މިސްކިތްތަކުގެ އިމާމުންނަށް އަންގާފައެވެ.

މީގެ އިތުރުން ސައުދީގެ އިސްލާމިކް މިނިސްޓްރީންވަނީ މިސްކިތްތެރޭގައި ރޯދަވީއްލުމުގެ ކަންތައްތައް ކުރިއަށް ނުގެންދެވުނު ނަމަވެސް މިސްކިތާއި ކައިރި ހިސާބެއްގައި ޓެންޓުފަދަ އެއްޗެހި ޖަހައިގެން، އެކަމަށް ހާއްސަ ސަރަހައްދެއްގައި ރޯދަ ވީއްލުން ކުރިއަށް ގެންދިއުމަށް ހުއްދަ ދީފައެވެ.

ސައުދީގައި ރަމަޟާން މަހު މިސްކިތްތަކުގައި އަމަލުކުރާނެ އުސޫލުތައް ކަނޑައަޅާ އާންމުކޮށްފައިވާއިރު، މިއަހަރު މިސްކިތްތަކުގައި ކެމެރާ ހަރުކޮށް، ވީޑިއޯކޮށް، އެކިއެކި މީޑިއާތަކުން ބްރޯޑްކާސްޓްކުރުންވެސް ވަނީ މަނާކޮށްފައެވެ. އެގައުމުގެ ކަމާއި ބެހޭ އިދާރާތަކުން ބުނީ މި ގޮތަށް ނިންމީ އެކަމަކުގެ ސަބަބުން އިމާމުންނަށް އަޅުކަމަށްދެވޭ ސަމާލުކަން ކުޑަވެދާނެކަމަށް ބެލުމަށްފަހުކަމަށެވެ.