އިރާނަށް އަމާޒުކޮށް ހަމަލާ ދިނުމަށްޓަކައި އެމެރިކާގެ އަސްކަރީ މަތިންދާބޯޓުތަކާއި ބޭސްތައް ބޭނުންކުރުމުގެ ހުއްދަ ނުދިނުމަށް ސައުދީ އަރަބިއްޔާއިން ނިންމި ނިންމުމަށް އިރާނުން މަރުހަބާ ކިޔައި، ސައުދީއަށް ޝުކުރު އަދާކޮށްފިއެވެ.
މިކަމާ ގުޅޭގޮތުން އިރާނުގެ އިސް އޮފިޝަލުން ވިދާޅުވީ، ސައުދީ އަރަބިއްޔާއިން މި ނިންމުން ނިންމާފައިވަނީ ސަރަހައްދީ ހަމަޖެހުމާއި އިސްލާމީ އުންމަތުގެ މަސްލަހަތަށް އިސްކަންދީގެން ކަމަށެވެ. މިއީ މެދުއިރުމަތީގެ ގައުމުތަކުގެ މެދުގައި އޮންނަންޖެހޭ އެއްބާރުލުން ދައްކުވައިދޭ މުހިންމު ފިޔަވަޅެއްގެ ގޮތުގައި އިރާނުން ސިފަކުރެއެވެ.
އިރާނާއި އިސްރާއީލާ ދެމެދު އުފެދިފައިވާ ނުތަނަވަސްކަމުގެ ތެރެއިން، އެމެރިކާއިން ބޭނުންވީ ސަރަހައްދީ ބައެއް ގައުމުތަކުގައި ހުރި އެމެރިކާގެ އަސްކަރީ މަރުކަޒުތައް ބޭނުންކޮށްގެން އިރާނަށް އަމާޒުކޮށް ފިޔަވަޅުތަކެއް އެޅުމަށެވެ. ނަމަވެސް ސައުދީ އަރަބިއްޔާއިން ވަނީ އެ ގައުމުގެ ސަރަހައްދީ ރަހުމަތްތެރި ގައުމަކަށް ހަމަލާދިނުމަށް އެ ގައުމުގެ ފަސްގަނޑު ނުވަތަ ވައިގެ ސަރަހައްދު ބޭނުންކުރުމުގެ ހުއްދަ ނުދޭނެކަން ސާފުކޮށް ބުނެފައެވެ.
މި ނިންމުމަކީ ފަހަކަށް އައިސް އިރާނާއި ސައުދީ އަރަބިއްޔާއާ ދެމެދު އޮތް ގުޅުން ރަނގަޅުވަމުންދާ ކަމުގެ ހެއްކެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ. އަދި މިއީ ބޭރުގެ ބާރުތަކުން ސަރަހައްދީ ކަންކަމުގެ ތެރެއަށް ވަދެ، އިސްލާމީ ގައުމުތަކުގެ މެދުގައި ފިތުނަ އުފެއްދުމަށް ކުރާ މަސައްކަތްތަކަށް ލިބުނު ނާކާމިޔާބީއެއްގެ ގޮތުގައިވެސް ވަނީ ފާހަގަކޮށްފައެވެ.
އިރާނުގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، ސައުދީގެ މި ހަރުދަނާ ނިންމުމުގެ ސަބަބުން ސަރަހައްދީ ސަލާމަތާއި ރައްކާތެރިކަން ދެމެހެއްޓުމަށް ބޮޑު ބާރަކަށް ވާނެ ކަމަށެވެ. އަދި ކުރިއަށް އޮތް ތަނުގައިވެސް އިސްލާމީ އަޚުވަންތަކަމުގެ ރޫހުގައި ދެ ގައުމުގެ ގުޅުން އިތުރަށް ބަދަހިވެގެންދާނެ ކަމަށް އުންމީދުކުރާ ކަމަށް އިރާނުން ބުނެފައިވެއެވެ.
