ސައުދީ އަރަބިއްޔާގެ ވެރިރަށް ރިޔާދުގައި ހުންނަ އެމެރިކާ އެމްބަސީއަށް އީރާނުން ދިން ޑްރޯން ހަމަލާތަކެއް ސައުދީ ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
ސައުދީ އަރަބިއްޔާގެ ކަމާބެހޭ ފަރާތްތަކުން މައުލޫމާތު ދޭ ގޮތުގައި، މި ހަމަލާ ދީފައިވަނީ ދެ ޑްރޯން ބޭނުންކޮށްގެންނެވެ. މި ހަމަލާއާ ގުޅިގެން އެމްބަސީ ސަރަހައްދުގައި އަލިފާނުގެ ހާދިސާއެއް ހިނގާފައިވީ ނަމަވެސް، އެމްބަސީގެ އިމާރާތަށް ބޮޑު ގެއްލުމެއް ލިބިފައި ނުވާ ކަމަށް ސައުދީގެ ދިފާއީ ވުޒާރާއިން ވަނީ ބުނެފައެވެ.
ސައުދީ ދިފާއީ ވުޒާރާގެ ތަރުޖަމާނު ވިދާޅުވީ، "މިހާތަނަށް ބެލި ބެލުމުން ރިޔާޟުގައި ހުންނަ އެމެރިކާ އެމްބަސީއަށް ދެ ޑްރޯނުން ހަމަލާ ދިނީ. އެ ހަމަލާގެ ސަބަބުން އަލިފާނުގެ ހާދިސާއެއް ހިނގީ. އަލިފާން ރޯވި އިމާރާތަށް ކުޑަ ގެއްލުމެއް ވެފައިވަނީ،" ކަމަށެވެ. މި ހަމަލާގައި އެއްވެސް މީހަކަށް ޖިސްމާނީ އަނިޔާއެއް ނުވަތަ ފުރާނައަށް ގެއްލުމެއް ލިބިފައި ނުވާކަން ރިޕޯޓުތަކުން ކަށަވަރުވެއެވެ.
މިކަމާ ގުޅިގެން ސައުދީ ފޮރިން މިނިސްޓްރީން ނެރުނު ބަޔާނެއްގައި، މިއީ ވަރަށް އަނިޔާވެރި ހަމަލާއެއްގެ ގޮތުގައި ސިފަކޮށް، އެންމެ ހަރުކަށި އިބާރާތުން އެކަން ކުށްވެރިކޮށްފައިވެއެވެ. އަދި ގައުމުގެ އަމިއްލަ މަސްލަހަތު ދިފާއުކުރުމަށްޓަކައި އަޅަންޖެހޭ ކޮންމެ ފިޔަވަޅެއް އެޅުމުގެ ހައްގު ސައުދީއަށް ލިބިގެންވާ ކަމަށާއި، އޭގެ ތެރޭގައި ބަދަލުހިފުމުގެ ހަމަލާ ދިނުންވެސް ހިމެނޭކަމަށް އެ ބަޔާނުގައި ފާހަގަކޮށްފައިވެއެވެ.
އީރާނުގެ އަސްކަރީ އެންމެ ވަރުގަދަ ބާރު ކަމަށްވާ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން މި ހަމަލާ ދީފައިވަނީ "އެމެރިކާގެ ސިޔާސީ ސެންޓަރުތައް" ނައްތާލުމުގެ މަސައްކަތް ފަށާފައިވާކަން އިއުލާނުކުރުމަށް ފަހުގައެވެ.
މި ހާދިސާއާ ގުޅިގެން ބައެއް ފަރާތްތަކުން ދަނީ ފާޑުކިޔަމުންނެވެ. އެގޮތުން، އިޒްރޭލާއި އެމެރިކާ ގުޅިގެން މުސްލިމް ލީޑަރުން ޝަހީދުކުރަމުންދާއިރު އެކަމާ މެދު އެއްޗެއް ނުބުނެ، އީރާނުން އެމެރިކާ އެމްބަސީއަށް ހަމަލާދިނުމުން ސައުދީން އެކަން ކުށްވެރިކުރުމަކީ، ސައުދީ އަރަބިއްޔާއިން ޒަޔަނިސްޓުންގެ މަސްލަހަތަށް ތަބާވާކަމުގެ ހެއްކެއް ކަމަށް ބައެއް ފަރާތްތަކުން ތުހުމަތުކުރެއެވެ.
