ކުޑަކުދިންނަށް ދިނުމަށް ބޭނުންކުރާ ފޯމިއުލާއެއްގައި ބައްޔެއް ފަތުރާ ޖަރާސީމެއް ހުރިކަން ފާހަގަވުމާ ގުޅިގެން، އެ ވިއްކުން ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މަނާކޮށްފި އެވެ.
އެމްއެފްޑީއޭ އިން ނެރުނު ނޫސް ބަޔާނެއްގައި ބުނީ، އެމެރިކާގެ އުފެއްދުމެއް ކަމަށްވާ ”ބައިހާޓް ހޯލް ނިއުޓްރިޝަން އިންފެންޓް ފޯމިއުލާ“ އިން ކުލޮސްޓްރިޑިއަމް ބޮޓުލިނަމް ޖަރާސީމު ފެނިފައިވާ ކަމަށެވެ.
އެހެންކަމުން، މި އުފެއްދުން ބާޒާރުން ނެގުމަށާއި، ވިއްކުން ހުއްޓާލުމަށް، އަދި ނައްތާލުމަށް އެމެރިކާގެ އެފްޑީއޭ އިން އަންގާފައިވާ ކަން ދުނިޔޭގެ ސިއްހަތު ޖަމިއްޔާގެ އިންޓަނޭޝަނަލް ފުޑް ސޭފްޓީ އޮތޯރިޓީސް ނެޓްވޯކް މެދުވެރިކޮށް އެނގިފައިވާ ކަމަށް އެމްއެފްޑީއޭއިން ވަނީ ބުނެފައެވެ.
އެހެންކަމުން، ރައްކާތެރިކަމުގެ ފިޔަވަޅެއްގެ ގޮތުން، މި ބްރޭންޑުގެ ހުރިހާ ބެޗެއް ވެސް ރާއްޖެއަށް އެތެރެކުރުމާއި، އަދި ރާއްޖޭގައި ވިއްކުމަކީ މަނާކަމެއް ކަމަށް އެ އޮތޯރިޓީން ވަނީ ކަނޑައަޅާފަ އެވެ.
