ހުރި ފައިދާ ބުނެ ނުދީ ގައުމުގައި ހުރި ގާނޫނުތައް ބަދަލުކުރާނީ އިޚުލާސްތެރި ނޫން ވެރިން ކަމަށް ޕީއެންއެފް ރައީސް، ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފްގެ ޖަލްސާގައި އާދިއްތަ ދުވަހުގެރޭ ވާހަކަފުޅު ދައްކަވަމުން އެރޭގެ މައުޟޫއަށް ރައީސް ޔާމީން ވަނީ ނަޒަރު ހިންގަވާލައްވާފައެވެ. އެގޮތުން "ރައީސުލްޖުމްހޫރިއްޔާގެ މަސްއޫލިއްޔަތު" މި މައުޟޫއަށް އިންސާފުކޮށްދެއްވާ ވާހަކަފުޅު ދައްކަވަމުން ރައީސް ޔާމީން ވިދާޅުވީ، ބޭނުންވާހާ ކަންކަމަށް މަގު ފަހިކުރުމަށް، ހެދިފައި ހުރި ގާނޫނުތައް އެ ފުށް މިފުށަށް ޖެހުމަކީ ރަގަޅު ގޮތެއް ނޫން ކަމަށެވެ.

އެގޮތުން މާލިއްޔަތު ގާނޫނާ އަދި ކައުންސިލްތަކުގެ ގާނޫނަށް ރައީސް މުއިއްޒުގެ އޮޅު ހިޔާ ފެސިލިޓީގެ ގޮތުގައި ރައީސް ޔާމީން ސިފަކުރައްވާ ރައްޔިތުންގެ މަޖިލީހުން ގެނައި ބަދަލުތަކަކީ އެއީ ގާނޫނުތަކާ ކުޅުމުގެ ގޮތުގެ އެމަނިކުފާނު ސިފަކުރައްވާފައިވެއެވެ.

ރައީސް ޔާމީން ވަނީ، ހުރި ފައިދާތަކެއް ބުނެ ނުދީ ގާނޫނުތައް ބަދަލުކުރުމަކީ އޭގެ ޒާތުގައި މަޖިލިސް، ވެރި މީހާ އަތުގައި އޮތަސް، ރައްޔިތުންނަށް އިޚްލާސްތެރި ބައެއްގެ ގޮތުގައި ބެލުމުގެ ފުރުސަތު އެބަ އޮތްތޯ، ސުވާލު އުފައްދަވާފައެވެ.

ރައީސް ޔާމީން ވަނީ ކުރިއަށް ދާން ނޭގުމުން އެމްޑީޕީއިން ވެސް މާލިއްޔަތު ގާނޫނު ސަސްޕެންޑުކުރުމަށް ފަހު ފައިސާ ޗާޕުކުރިކަން ފާހަގަކުރައްވާފައެވެ. އަދި ވިދާޅުވީ އެކަންކަމަށް ފާޑުވިދާޅުވަމުން ވެރިކަމަށް ވަޑައިގެންނެވި ބޭފުޅުންވެސް ހަމަ އެއް ގޯސްތަކެއް ތަކުރާރުކުރަމުން ގެންދާ ކަމަށެވެ.

ރައީސް ޔާމީން އިތުރަށް ވިދާޅުވީ، ރައީސް މުއިއްޒުގެ މައްޗަށް އަންނަ ތުހުމަތުތަކަށް އެމަނިކުފާނު ޖަވާބުދާރީވާން ޖެހިވަޑައިގަންނަވާ ކަމަށެވެ. ނަމަވެސް ރައީސް މުއިއްޒު ގެންދަވަނީ މުއައްސަސާތަކަށް ނުފޫޒު ފޯރުވާ މައްސަލަތައް އޮއްބާލައްވަމުން ކަމަށް ވެސް ރައީސް ޔާމީން ތުހުމަތު ކުރައްވާފައިވެއެވެ.