ހުޅުމާލޭގެ ހުސްބިންތަކާއި މަގުތަކުގައި ގަވާއިދާ ހިލާފަށް ޕާކުކޮށްފައިވާ އުޅަނދުތައް އަންނަ އާދިއްތަ ދުވަހުން ފެށިގެން ޓޯ ކުރާނެ ކަމަށް ފުލުހުން ބުނެފި އެވެ.
ފުލުހުން މިއަދު ބުނީ ހުޅުމާލޭގެ ހުސްބިންތަކާއި އާންމު ދަތުރުފަތުރަށް ބޭނުންކުރާ މަގުތަކުގައި ގަވާއިދާ ހިލާފަށް ޕާކްކޮށްފައިވާ ހުރި އުޅަނދުތަކާއި ރަޖިސްޓްރީ ނުކޮށް ބަހައްޓާފައިވާ އުޅަނދުތަކާއި އޭ ޒޯން ފިޔަވައި އެހެން ޒޯންތަކަށް ރަޖިސްޓްރީ ކޮށްފައިހުރި އުޅަނދުތައް ކަމާ ގުޅުންހުރި އިދާރާތަކާ ގުޅިގެން ނެގުމުގެ މަސައްކަތް ކުރާނެ ކަމަށެވެ.
އެފަދަ އުޅަނދުތައް ޓޯ ކޮށް ފުލުހުން ކަނޑައަޅާ ތަންތަނަށް ގެންދިއުމަށް ނިންމާފައިވާ ކަމަށް ވެސް ބުންޏެވެ. އެފަދަ އުޅަނދުތައް އަންނަ ހޮނިހިރު ދުވަހުގެ ރޭ 11:30ގެ ކުރިން އެތަންތަނުން ނެގުމަށް ވެސް ފުލުހުން ވަނީ އެދިފަ އެވެ.
މީގެ ކުރިންވެސް ގަވާއިދާއި ޚިލާފަށް ޕާކް ކޮށްފައި ހުރި އުޅަނދުތައް ނަގާފައިވާއިރު ޕާކް ކުރާނެ އިންތިޒާމްތަކެއް ސަރުކާރުން ހަމަޖައްސައިދީފައިނުވެއެވެ. ޕާކް ކުރުމުގެ ދަތިކަމުގެ ޝަކުވާ އާންމުން ކުރަމުން އަންނަ އިރު މިކަމަށް ހައްލެއް ހޯދައިނުދީ ޓޯވް ކުރުމަކީ އުސޫލެއް ނޫން ކަމަށް ބުނެ އާންމުން އަންނަނީ ސަރުކާރަށް ފާޑުކިޔަމުންނެވެ.
