ރައީސް މުއިއްޒު ރައީސަކަށް ވެ ވަޑައިގަތުމަށްފަހު އަރިހުގައި ތިއްބެވި ބޭފުޅުން ރައީސް އަބްދުﷲ ޔާމީން އަބްދުލް ގައްޔޫމް ކުރެއްވި ހުރިހާ މަސައްކަތެއްގެ ކުރެޑިޓު ރައީސް ޑރ މުހައްމަދު މުއިއްޒުއަށް ދެމުން އަންނަ ކަމަށް ރައީސް ޔާމީންގެ އިސް ގާނޫނީ ވަކީލް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.

ޑރ ޖަމީލް މިފަދައިން ވިދާޅުވީ މަޖިލިސް އިންތިހާބުގައި ޕީއެންއެފްގެ ފަރާތުން ވާދަކުރައްވާ ކެނޑިޑޭޓުން ތައާރަފް ކުރުމަށް ބާއްވަމުން އަންނަ ސިލްސިލާ ޖަލްސާތަކުގެ ތެރެއިން އާދިއްދަ ދުވަހު ބޭއްވި ޖަލްސާގައި ކެނޑިޑޭޓަކާ ސުވާލު ކުރައްވަމުނެވެ.

ޑރ ޖަމީލް ވިދާޅުވީ ރައީސް ޑރ މުއިއްޒު ވެރިކަމަށް ވަޑައިގަތުމަށް ފަހުގައި އަރިހުގައި ތިއްބެވި ބޭފުޅުން ރައީސް ޔާމީން ކުރެއްވި ހުރިހާ ކަމެއްގެ ކުރެޑިޓު ރައީސް މުއިއްޒުއަށް އާންމު ގޮތެއްގައި ދެމުން ދާކަމަށެވެ.

ޑރ ޖަމީލް ވިދާޅުވީ ރައީސް ޔާމީން ހިންގަވާފައިވާ ބޮޑު މާސިންގާ ޕްރޮޖެކްޓުތަކުގެ މޭސްތިރިއަކީ ޑރ މުއިއްޒު ކަމަށް އެބޭފުޅުން ބުނަމުން އަންނަ ކަމަށެވެ.

ޑރ ޖަމީލް ވިދާޅުވީ މިހާރު ޑރ މުއިއްޒު އެހުންނެވީ ރައީސް އަކަށް ކަމަށާއި ބޮޑެތި ޓަނެލްތައް ހެދުން ފަދަ ޕްރޮޖެކްޓުތައް ހިންގުމަށް ވައުދު ވަޑައިގަންނަވަމުން ދާކަމަށެވެ. އަދި މިކަމާ ގުޅިގެން ޑރ ޖަމީލް ވަނީ ރައީސް ޔާމީންގެ ޒައާމަތުގައި ރައީސް ޔާމީން ގެނައި ތަރައްގީގެ މޭސްތިރިއަކަށް ހަގީގަތުގައިވެސް ޑރ މުއިއްޒުވެދާނެ ކަމާމެދު ސުވާލު އުފައްދާފައެވެ.