ޖަޕާނުގެ ބައެއް ސަރަހައްދުތަކުގައި މުސްލިމުންގެ ގަބުރުސްތާނު އެޅުމަށް ރާވާފައިވާ ޕްލޭންތަކަށް އެގައުމުގެ ސަރުކާރުން ދެކޮޅު ހަދަމުންދާ ކަމަށް ރިޕޯޓްތައް ބުނާ މައްސަލައެއްގައި، އެ ސަރުކާރަށް ވަރަށް ބޮޑަށް ފާޑުކިޔުންތައް އަމާޒުވެއްޖެއެވެ.

މި މައްސަލަ ހޫނުވެގެންދިޔައީ، މުސްލިމުން "އެނބުރި ގައުމަށް ގޮސް އެތަނުގައި ވަޅުލަން" ޖެހޭ ކަމަށް ޖަޕާނުގެ ސަރުކާރުން ބުނުމާއި ގުޅިގެންނެވެ. މި ބަޔާނަށް ގިނަ ބަޔެއްގެ ފާޑުކިޔުންތައް އަންނަނީ އަމާޒުވަމުންނެވެ.

ޖަޕާނުގައި ދިރިއުޅޭ މުސްލިމުން ބުނަނީ އިސްލާމީ ސަގާފަތުގައި މީހުން އަންދާލުމުގެ ބަދަލުގައި ވަޅުލުން ލާޒިމުވާތީ، އެމީހުންނަށް ރަނގަޅު ވަޅުލުމުގެ ޖާގަތަކެއް ބޭނުންވާ ކަމަށެވެ. ގިނަ މުސްލިމް އާއިލާތަކުން ޖަޕާނުގައި ދިރިއުޅެ މަސައްކަތް ކުރަމުންދާ އިރު، އެއީ އެމީހުންގެ ގައުމު ކަމަށް ދެކެއެވެ. އެހެންކަމުން މިކަމަކީ އެމީހުންގެ އަސާސީ ހައްގަކަށް ވާއިރު، އެކަމަށް ހުރަސް އެޅުމަކީ ގަބޫލުކުރެވޭނެ ކަމެއް ނޫން ކަމަށް އެފަރާތްތަކުން ބުނެއެވެ.

ހައްގުތަކާ ބެހޭ ޖަމާއަތްތަކުން ވަނީ މި މައްސަލައާ ގުޅިގެން ސަރުކާރުގެ ފަރާތުން ނެރެފައިވާ ބަޔާންތަކުން ޖަޕާން ސަރުކާރުގެ ވިސްނުމުގެ ދަށްކަން ފެންނަ ކަމަށް ބުނެފައެވެ.

މިހާތަނަށް ޖަޕާނު ސަރުކާރުން މި މައްސަލައާ ގުޅިގެން އިތުރު މައުލޫމާތެއް ހިއްސާކޮށްފައި ނުވާއިރު ގިނަ ބަޔަކު މިހާރު ގޮވާލަމުންދަނީ މަޝްވަރާ ކުރުމާއި، ދީނީ ޢަޤީދާތަކަށް އިޙްތިރާމް ކުރުމާއި، ޖަޕާނުގައި ދިރިއުޅޭ ހުރިހާ ޖަމާޢަތްތަކަކާ މެދު އިންސާފުވެރި މުޢާމަލާތް ކުރުމަށެވެ.