އިސްރާއީލުން ފަލަސްތީނުގެ ޣައްޒާގައި ކުރަމުންދާ ހަނގުރާމަ ހުއްޓާލުމާ ގުޅިގެން އެއްބަސްވުމަކަށް އައުމަށް މެދުވެެރިންނާއި ހަމާސް ޖަމާއަތާއި ދެމެދު ފާއިތުވި ދެ ދުވަހު މިސްރުގެ ވެރިރަށް ގާހިރާ ގައި ކުރިއަށް ދިޔަ މަޝްވަރާތައް، ކާމިޔާބީއެއް ނުލިބި ނިންމާލައިފިއެވެ.

ހަމާސްގެ ސީނިއާ އޮފިޝަލް ބައްސާމް ނައީމް ބުނެފައިވަނީ ދެ ދުވަހުގެ މަޝްވަރާތަކުގެ ތެރެއިން ހަމަލާތައް ހުއްޓާލަން އެ ޖަމާއަތުން މެދުވެރިންނަށް އެއްބަސްވުމެއް ހުށައަޅާފައިވާނެ ކަމަށާއި، މިހާރު އިންތިޒާރު ކުރަމުން ދަނީ އިސްރާއީލުގެ ޖަވާބަކަށް ކަމަށެވެ.

މަޝްވަރާގެ މި ބުރުގައި އިސްރާއީލުން ބައިވެރިވެފައެއް ނުވެއެވެ.

ނައީމް މިހެން ބުނެފައި މިވަނީ އިސްރާއީލުން ޣައްޒާގައި ކުރަމުންދާ ހަނގުރާމަ ހުއްޓާލައި، ހަމާސްގެ ބެލުމުގެ ދަށުގައި ތިބި އަސީރުން މިނިވަން ކުރުމަށް ހެދިފައިވާ އެއްބަސްވުމެއްގެ އޮނިގަނޑު އިސްރާއީލުން ގާތްގަނޑަކަށް ގަބޫލު ކޮށްފައިވާ ކަމަށާއި، މިހާރު އެ އެއްބަސްވުން ގަބޫލު ކުރުން އޮތީ ހަމާސް ގެ އަތްމަތީގައި ކަމަަށާއި ބޯޅަ އޮތީ ހަމާސްގެ ފަޅީގައި ކަަމަށް އެމެރިކާގެ އޮފިޝަލަކު މީގެ ދެ ދުވަސް ކުރިން ބުނެފައި ވަނިކޮށެވެ.

ހަމާސް އިން ކުރިން ބުނެފައިވަނީ އެމެރިކާ އިން އެހެން ބުނެފައިވަނީ އެއްބަސްވުމަކަށް ނާދެވި މަޝްވަރާތައް ނިމިއްޖެ ކަމުގައި ވާނަމަ އެކަމުގެ ޒިންމާއިން އިސްރާއީލު ދުރުކޮށް ހަމާސްގެ ބޮލުގައި އެކަން އެޅުވުމަށް ކަމަށެވެ.

ގާހިރާގެ މަޝްވަރާތަކާއި ގުޅިގެން އާންމު ކޮށް ވާހަކަ ދައްކަން އިސްރާއީލުން ވަނީ ދެކޮޅު ހަދާފައެވެ.

އޮފިޝަލަކާ ހަވާލާދީ ރޮއިޓާސް އިން ބުނެފައިވަނީ އިސްރާއީލުން މަޝްވަރާތަކުގައި ބައިވެެރި ނުވީ ހަމާސްގެ ބެލުމުގެ ދަށުގައި މިހާރު ދިރި ތިބި އަސީރުންގެ ލިސްޓެއް ދިނުމަށް އިސްރާއީލުން ކުރި ޝަރުތަށް ހަމާސް އިން ދެކޮޅު ހެދުމުން ކަމަށެވެ.

ނައީމް ބުނެފައިވަނީ އަސީރުން ތިބީ އެކި ހިސާބުތަކުގައި، އެކި ގުރޫޕުތަކުގެ ބެލުމުގެ ދަށުގައި ކަމުން ފުރަތަމަ ހަމަލާތައް ހުއްޓާނުލާ އެކަން ނުވާނެ ކަމަށެވެ.

މިފަހަރު މިސްރުގައި ކުރިއަށް މިދިޔަ މަޝްވަރާތަކަކީ ރަމަޟާން މަސް ފެށުމުގެ ކުރިން ހަމަލާތައް ހުއްޓާލަން އެއްބަސްވުމަކަށް އައުމަށް ކުރެވުނު އެންމެ ފަހުގެ މަސައްކަތެވެ.