ފަލަސްތީނުގެ އިސް ޖަމާއަތެއް ކަމަށްވާ ހަމާސްގެ އަސްކަރީ ގޮފީ ކަމަށްވާ ގައްސާމް ބްރިގޭޑްސްގެ ތަރުޖަމާން އަބޫ އޮބައިދާ މަރާލާފައިވާ ކަމަށް ރިޕޯޓްތައް ބުނެފިއެވެ.
މިދިޔަ ހުކުރު ދުވަހު ފަލަސްތީނުގެ ޖަމާއަތަކުން ނެރުނު ބަޔާނެއްގައި މިކަން ވަނީ ކަށަވަރުކޮށްދީފައެވެ.
އަބޫ އޮބައިދާ ސަހްޔޫނީނުން މަރާލާފައިވާކަމަށް ހާމަކޮށްފައިވަނީ ފަލަސްތީނުގެ ޖަމާއަތަކުން ނެރުނު ބަޔާނެއްގައި ކަމަށްވާއިރު، އޭނާ މަރުވި ކަމުގެ ތަފްސީލެއް އަދި ހާމަކޮށްފައެއް ނުވެއެވެ.
ސަހްޔޫނީންގެ ކަމާބެހޭ ފަރާތްތަކުން މިކަމާ ގުޅިގެން އަދި ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.
އަބޫ އޮބައިދާއަކީ އިޒްރޭލާ ދެކޮޅަށް ހަނގުރާމަ ހިނގަމުން ދިޔަ ދުވަސްވަރު ވަރަށް ގިނައިން މުހިންމު ބަޔާންތައް ދެއްވި ބޭފުޅެކެވެ. އޭނާގެ ބަޔާންތަކުން ވަނީ ޣައްޒާގައި ހިނގަމުންދާ ހަނގުރާމައިގެ ހާލަތާއި، ހަމާސްގެ ހަރަކާތްތަކާ ބެހޭ އެކި މައުލޫމާތުތައް ދުނިޔެއަށް ހާމަކޮށްދީފައެވެ. އޭނާގެ ނަން ފާހަގަކުރެވިފައިވަނީ ފަލަސްތީނުގެ ހަނގުރާމައިގެ މައިދާނުގައި ހަމާސްގެ އަޑު ގަދަ ކުރެއްވި އެއް ބޭފުޅާގެ ގޮތުގައެވެ.
އޭނާ މަރުވިކަމުގެ ޚަބަރު ފެތުރިފައިވާއިރު، މިކަމުގެ ސަބަބުން ހަމާސްއިން ރައްދު ދޭނެތޯ ބެލުމަށް ގިނަ ބަޔަކު ދަނީ އިންތިޒާރު ކުރަމުންނެވެ.
