ވެނެޒުއެލާގެ ރައީސް އެމެރިކާއިން ވަގަށް ނަގައިގެން ގެންދިޔަ ހާދިސާއަކީ އިރާނަށް ދެވުނު ވަރުގަދަ އިންޒާރެއް ކަމަށް ބުނެ، ސަހްޔޫނީންގެ އިދިކޮޅު ލީޑަރު ޔައީރު ލަޕިޑް ބަހުގެ ހަމަލާތަކެއް އަމާޒުކޮށްފިއެވެ.
ސަހްޔޫނީންގެ އިދިކޮޅު ލީޑަރު މިފަދަ މޭރުމަކުން ވާހަކަދައްކާފައިވަނީ އޭނާގެ ރަސްމީ އެކްސް އެކައުންޓުން ކުރި ޕޯސްޓެއްގައެވެ.
އޭނާ ބުނެފައިވާ ގޮތުގައި، ވެނެޒުއެލާގެ ރައީސް އެމެރިކާ ސިފައިންގެ ބެލުމުގެ ދަށަށް ގެންދިޔަ ފަދައިން، އިރާނުގެ ތެރެއަށް ވެސް ވަދެގަނެ އެފަދަ ފިޔަވަޅެއް އެޅުމުގެ ގާބިލުކަން އެބައޮތެވެ.
މި ޚަބަރު ފެތުރިގެން ދިޔައީ ވެނެޒުއެލާގައި ހިނގާދިޔަ ސިޔާސީ ހަލަބޮލިކަމުގެ ތެރެއިން އެ ގައުމުގެ ރައީސް އެމެރިކާގެ ބާރުގެ ދަށަށް ގެންދިޔަ ކަމަށް ބުނާ މައުލޫމާތުތަކާ ގުޅިގެންނެވެ. ސަހްޔޫނީ ލީޑަރުގެ މި ވާހަކަތަކަކީ ސަރަހައްދީ މަސްލަހަތު ގޯސްވެފައިވާ ދަނޑިވަޅެއްގައި އިރާނަށް ބިރުދެއްކުމުގެ ގޮތުން ދައްކާފައިވާ ވާހަކަތަކެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
މި އިންޒާރާ ގުޅިގެން އިރާނުން އަދި ރަސްމީކޮށް އެއްޗެއް ބުނެފައިނުވި ނަމަވެސް، ސަހްޔޫނީންގެ މިފަދަ އަމަލުތަކަކީ ބައިނަލްއަގުވާމީ ގާނޫނުތަކާ ޚިލާފު އަދި ސަރަހައްދީ ސުލްހައަށް އޮތް ނުރައްކަލެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ. އެމެރިކާ އާއި ސަހްޔޫނީން ގުޅިގެން ހިންގާ މިފަދަ އަމަލުތަކަކީ މިނިވަން ދައުލަތްތަކުގެ އިސްތިގުލާލަށް އަރައިގަތުން ކަމަށް ބުނެ ގިނަ ބައެއްގެ ފާޑުކިޔުން ވަނީ އަމާޒުވެފައެވެ.
