ގައުމުގައި އޮންނަ އެންމެ މައި ދެ އިންތިހާބު އެއްކޮށްލާ ނަގާލެވެނީ ސަރުކާރު ޖަވާބުދާރީކުރުވުމުގެ ފުރުސަތު ކަމަށް ޕީއެންއެފްގެ ރައީސް، ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފްގެ ޓައުން ހޯލު ޖަލްސާގައި އާދިއްތަ ދުވަހުގެރޭ ވާހަކަފުޅު ދައްކަމަމުން ރައީސް ޔާމީން ވަނީ، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލަން ސަރުކާރުގެ ފަރާތުން ގާނޫނުއަސާސީއަށް އިސްލާހު ހުށަހަޅައިފައިވާއިރު، ޗުއްޓީގައި މިހާރު އޮތް މަޖިލިސް މެދުވެރިކޮށް ދައުރުން ބޭރުން ޖަލްސާތައް ބާއްވާ އަވަސް އަރުވާލައިގެން ގާނޫނު އަސާސީއަށް އިސްލާހު ގެންނަން އުޅޭ އުޅުމަށް އިޝާރާތްކުރައްވާ ވާހަކަފުޅު ދައްކަވާފައެވެ.

އެމަނިކުފާނު ވިދާޅުވި، ރައީސަކު ވެރިކަމަށް އައުމަށް ފަހު ގޯސް ހަދާ ތަން ފެނުނީމާ ރައްޔިތުންގެ މަޖިލީހަށް ހުއްޓުވޭނީ، ރިޔާސީ އިންތިހާބަށް ފަހުން މިހާރު އޮންނަ ގޮތަށް މަޖިލިސް އިންތިހާބު އޮވެގެން ކަމަށެވެ. ހަމައެހެންމެ ބައެއް ސިޔާސީ ލީޑަރުން އެކަމަށް އަތް ޖެއްސެވި ނަމަވެސް، އެ ބަދަލު ގެނައުމުގެ ހިކުމަތެއް އެ މަނިކުފާނަށް ނުވިސްނޭ ކަމަށެވެ. އެގޮތުން ރައީސާއި މަޖިލީހަކީ އެކަކު އަނެކަކު މައްޗަށް ފާރަވެރިވާ ދެ ބާރުކަން ފާހަގަކުރެއްވިއެވެ.

މީގެ އިތުރުން ޚަރަދު ކުޑަކުރުމުގެ ނަމުގައި ދެ އިންތިހާބު އެއްކޮށްލަން ކަމަށް ސަރުކާރުން ބުނި ނަމަވެސް، އެ ބަދަލާއެކު ރައްޔިތުންގެ މާ ބޮޑު މަސްލަހަތެއް ގެއްލޭ ކަމަށެވެ.

ހަރަދު ކުޑަކުރުމުގެ މަގުސަދުގައި ދެ އިންތިހާބު އެއްކޮށްލަންޖެހޭ ސަބަބެއް ނެތް ކަމަށާއި އެ މަގުސަދުގައި އެކަން ކުރާ ނަމަ ހުރިހާ އިންތިހާބުތަކެއް އެއްކޮށްލަންވީ ކަމަށް ޔާމީން ވިދާޅުވިއެވެ.

ފަސް ވަރަކަށް އިންތިހާބު ބާއްވާ މިންވަރަށް ރައީސް މުހައްމަދު މުއިއްޒު ތަންތަނަށް ދަތުރުކުރައްވާ ކަމަށާއި ހަރަދު ކުޑަކުރާ ނަމަ، އެ ފައިސާ އަނބުރާ ދައްކަވަންވީނޫންތޯ ޔާމީން ސުވާލުކުރެއްވިއެވެ.