މިހާރުގެ ސަރުކާރުން ހިންގަމުންދާ ނޭދެވޭ ކަންތައްތައް ހުއްޓުވުމަށްޓަކައި، ހުރިހާ ފަރާތްތަކާ ގުޅިގެން މަސައްކަތް ކުރުމުގެ ޝައުގުވެރިކަން ރައީސް އަބްދުﷲ ޔާމީން އަބްދުލްގައްޔޫމް ރޭ ފާޅުކުރައްވައިފިއެވެ.
ރައީސް ޔާމީން މިހެން ވިދާޅުވީ، ކުރިއަށް އޮތް ލޯކަލް ކައުންސިލް އިންތިޚާބުގައި މާލޭގެ މޭޔަރުކަމަށް އަމިއްލަ ގޮތުން ވާދަކުރައްވާ އިސްމާއީލް ޒަރިޔަންދުގެ ކެމްޕޭން ހަފުލާއެއްގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވި ގޮތުގައި، ގައުމު އިޞްލާޙުކޮށް އިންސާފާއި ހަމަހަމަކަން ޤާއިމުކުރުމުގެ މަސައްކަތުގައި އެމަނިކުފާނާއި އެމަނިކުފާނުގެ ޓީމު އަދިވެސް އޮތީ ސާބިތުކަމާއެކު އެންމެ ކުރީ ސަފުގައެވެ.
ސަރުކާރުގެ އިސް މަގާމުތަކުގައި ތިއްބެވި ބޭފުޅުންނަށް ފާޑުވިދާޅުވަމުން ރައީސް ޔާމީން ވިދާޅުވީ، މިހާރު ތިއްބެވި ބޭފުޅުން ތިއްބެވީ "ނަގޫފިތިފައި" ކަމަށާއި، އެބޭފުޅުންނަށް އިސްލާހީ ބަދަލެއް ނުގެނެވޭނެ ކަމަށެވެ. އަދި ސަރުކާރުގެ އަމަލުތައް ހުއްޓުވަން އިދިކޮޅު ފަރާތްތަކާއެކު މަސައްކަތް ކުރަނީ ފިކުރު އެއްގޮތްވެގެން ނޫން ކަމަށާއި، ނަމަވެސް ބޮޑު "ނުބައެއް" ނުވަތަ "ޝައިތާނެއް" ދުރުކުރުމަށްޓަކައި އެންމެން އެއްގަލަށް އަރަންޖެހޭ ކަމަށް އެމަނިކުފާނު ސިފަކުރެއްވިއެވެ.
މާލޭގެ މޭޔަރުކަމަށް ޒަރިޔަންދު ނެރުއްވުމާ ގުޅޭގޮތުން ވާހަކަފުޅު ދައްކަވަމުން ރައީސް ޔާމީން ވިދާޅުވީ، އޭނާއަކީ އެމަނިކުފާނުގެ ޕާޓީގެ މެންބަރަކަށް ނުވިޔަސް، ޒަރިޔަންދު ނެރުއްވީ ގައުމީ މަސްލަހަތަށްޓަކައި ކަމަށެވެ. އަދި މާލެ ސިޓީ ކައުންސިލަކީ ރައީސް އޮފީހުގެ މިނިސްޓަރެއްގެ ކައިރީގައި ހުންނަ ޑެސްކަކަށް ވެގެންނުވާނެ ކަމަށް ވިދާޅުވެ، ރައީސް ޑރ. މުޙައްމަދު މުޢިއްޒުގެ ސަރުކާރަށް އެމަނިކުފާނު ވަރަށް ބޮޑަށް ފާޑުވިދާޅުވިއެވެ.
ރައީސް ޔާމީން އިތުރަށް ވިދާޅުވީ، މި ސަރުކާރުގެ ސަބަބުން ރައްޔިތުންނަށް އޮތީ ނުތަނަވަސްކަމާއި ގިލަންވެރިކަން ކަމަށާއި، މާލޭގެ މައްސަލަތައް ހައްލުކޮށް އިންސާފުވެރިކަމާއެކު ޚިދުމަތް ދެއްވާނީ ޒަރިޔަންދު ކަމަށް ގަބޫލުކުރައްވާ ކަމަށެވެ.
