އިދިކޮޅު ފަރާތްތަކަކީ ދީނާ ހިލާފު ސިޔާސީ ފިކުރެއްގެ ގޮތުގައި ރައީސް ޑރ.މުހައްމަދު މުއިއްޒު ސިފަކުރެއްވުމާއި ގުޅިގެން ޕީއެންއެފްގެ ނައިބު ރައީސް، ޑރ.މުހައްމަދު ޖަމީލް އަހުމަދު ފާޑުވިދާޅުވެއްޖެއެވެ.

ބުރާސްފަތި ދުވަހުގެ ރޭ ޕީއެންސީގެ އޮފީސް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މުއިއްޒު ވަނީ އިދިކޮޅު ސިޔާސީ ފިކުރުގެ ފަރާތްތަކަކީ ދީނާ ހިލާފު ބައެއްކަމަށް ވިދާޅުވެ އެ މޭރަމުން ވާހަކަ ދައްކަވާފައެވެ.

މިކަމާ ގުޅިގެން އެކްސް އެކައުންޓުގައި ކުރި ޕޯސްޓެއްގައި ޑރ.ޖަމީލް ވިދާޅުވީ އެންމެ ފުރިހަމަ މުއުމިނަކީ އެންމެ އަޚްލާގު ރަނގަޅު މީހާކަމަށެވެ.

މުއިއްޒު ދީނުގެ ވާހަކަ ދައްކަން ކުފޫހަމައެއް ނުވާކަން ކަށަވަރުކަމަށް ވެސް ޑރ.ޖަމީލް ވިދާޅުވިއެވެ. ޑރ.ޖަމީލް އިތުރަށް ވިދާޅުވީ ރައީސް އަބްދުالله ޔާމީން އަބްދުލްގައްޔޫމްގެ އިތުރުން އަމިއްލަ ދޮން މަންމައާ މެދު ކަންތައް ކުރިގޮތުން ދީން ސިޔާސީ މަންފާޔަށް ބޭނުން ކުރާ ފަރާތެއްކަން ފެންނަކަމަށެވެ.

ބޮޑާވުން ހުއްޓާލާ الله އަށް ބިރުވެތިވުމަށް ވެސް ޑރ.ޖަމީލް ވަނީ ޕޯސްޓުގައި ރައީސް މުއިއްޒަށް ގޮވާލާފައެވެ.

އިދިކޮޅު ފަރާތްތަކަކީ ދީނާ ހިލާފު ސިޔާސީ ބައެއްގެ ގޮތުގައި ސިފަކުރައްވާ ރައީސް މުއިއްޒު ދެއްކެވި ވާހަކަފުޅަށް ގިނަ އަދަދެއްގެ ބަޔަކު އަންނަނީ ފާޑުކިޔުން އަމާޒުކުރަމުންނެވެ.