ހުކުރު ދުވަހުން ފެށިގެން ޝައްވާލު މަހުގެ ހަތްވަނަ ދުވަހާއި ހަމައަށް ދަންވަރު 1:00 ހަމައަށް ފިހާރަތައް ދެން ހުޅުވާފައި ބެހެއްޓޭނެ ކަމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުން ބުނެފިއެވެ.

މި ގެނައި ބަދަލަކީ 1445 ވަނަ އަހަރުގެ ރަމަޟާން މަހަށް ރައްޔިތުންނަށް ލުއި ފަސޭހަ ހޯދައިދިނުމުގެ ގޮތުން ގެނައި ބަދަލެކެވެ.

އެގޮތުން ހުކުރު ދުވަހުން ފެށިގެން ޝައްވާލު މަހުގެ ހަތްވަނަ ދުވަހާއި ހަމައަށް މުދާ ވިއްކާ ތަންތަން ހުޅުވާފައި ބެހެއްޓޭނެ ގަޑިއަކީ ފަތިހު 5:30އިން މެންދަމު 1:00 އަށް ކަމަށެވެ.

އެހެންކަމުން ރާއްޖޭގައި މީހުން ދިރިއުޅޭ ރަށްތަކުގައި ހިންގާ މުދާ ވިއްކާ ތަންތަނުން އެގޮތަށް އަމަލު ކުރުމަށް އެ އިއުލާނުގައި އެދިފައިވެއެވެ.

މިނިސްޓްރީން ކުރިން ބުނެފައިވާ ގޮތުގައި، ރޯދަމަހުގެ ރޭތަކުގައި ކެއިން ބުއިމުގެ ހިދުމަތްދޭ ތަންތަން ހުޅުވާފައި ބަހައްޓަންވާނީ ކޮންމެ ދުވަހެއްގެ ވެސް ހަވީރު 5:30 އިން މެންދަމު 3:00 އާ ދެމެދު ކަމަށެވެ. އަދި ޝައްވާލްމަހުގެ ފުރަތަމަ 7 ދުވަހު ކެއިން ބުއިމުގެ ހިދުމަތްދޭ ތަންތަން ހުޅުވާފައި ބަހައްޓަންވާނީ އެ ދުވަހެއްގެ ފަތިހު 4:30 އިން މެންދަމު 3:00 އާ ދެމެދު ކަމަށް މިނިސްޓްރީން އިން ވަނީ މީގެ ކުރިން ބުނެފައެވެ.

ރާއްޖޭގައި އާންމުކޮށް ފިހާރަތައް ހުޅުވާފައި ހުންނަނީ ރޭގަނޑު 10:00 ނުވަތަ 11:00 އާ ހަމައަށެވެ.