ރާއްޖޭގައި ބޭރުގެ އިންވެސްޓަރުންނަށް އިންވެސްޓްކުރެވޭނެ ދާއިރާތަކާއި އިންވެސްޓްނުކުރެވޭނެ ދާއިރާތައް ކަނޑައަޅައި ސަރުކާރުން ރަސްމީކޮށް އެކަން އާންމުކޮށްފި އެވެ.
އިކޮނޮމިކް މިނިސްޓަރު މުހައްމަދު ސައީދު ވިދާޅުވީ އެ ލިސްޓް އެކުލަވާލީ މިދިޔަ އަހަރު ވުޖޫދުވި އާ ފޮރިން އިންވެސްޓްމަންޓް ގާނޫނުގެ ދަށުން ކަމަށެވެ.
ސައީދު ވިދާޅުވީ އެ ބަދަލު ގެނެސްފައި ވަނީ ބިޒްނަސް ކައުންސިލްގައި ސްޓޭކްހޯލްޑަރުންނާއެކު ގިނަ މަޝްވަރާ ތަކެއް ކުރުމަށްފަހު ކަމަށެވެ. މިއީ ވިޔަފާރީގެ ދާއިރާ އިން ދިވެހީންނަށް ފަހި ފުރުސަތުތަކެއް ހޯދައިދިނުމަށް ގެނެވުނު ބަދަލެއް ކަމަށް ވެސް ސައީދު ވިދާޅުވި އެވެ.
ބިދޭސީންނަށް ހަރަކާތެރި ނުވެވޭނެ ދާއިރާތައް
މި ބަދަލުތަކުގެ މައިގަނޑު އަސާސަކީ ދިވެހިން ކުރިއަރަމުން އަންނަ ދާއިރާތައް، ދިވެހިންނަށް ހާއްސަ ކުރުމާއެކު، ދިވެހީންނަށް ހުނަރާއި ގާބިލުކަން އިތުރަށް ބޭނުންވާ ދާއިރާތަކުގައި އެހީތެރިކަން ފޯރުކޮށްދިނުގެ ފުރުސަތު، ބޭރުގެ ފަރާތްތަކަށް ހުޅުވާލާފައި ބޭއްވުން ކަމަށް އިކޮނޮމިކް މިނިސްޓްރީން ބުނެފައިވެއެވެ.
