މާޗް 8 ވަނަ ދުވަހަކީ ހަމައެކަނި އަންހެނުންގެ ދުވަސް ނޫންކަމަށާއި އެމަނިކުފާނަށް ކޮންމެ ދުވަހަކީވެސް އަންހެނުންގެ ދުވަސް ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވެފައިވަނީ ފްރޮންޓް އޮފީހުގައި ސިލްސިލާ ގޮތެއްގެ މަތިން ބާއްވަމުން އަންނަ ޖަލްސާތަކުގެ ތެރެއިން ބުރާސްފަތި ދުވަހުގެ ރޭ ބޭއްވި ޖަލްސާގައި ވާހަކަދައްކަވަމުންނެވެ.
އެގޮތުން އެމަނިކުފާނު ވިދާޅުވީ އެމަނިކުފާނުގެ ޕާޓީގެ ފަރާތަކުން ދުވަހަކުވެސް އަންހެނުންގެ ކުރިއެރުމަކަށް ހުރަހެއް ނާޅާނެކަމަށެވެ.
އަންހެނުން ކުރިއެރުމުގައި އެމަނިކުފާނު އަބަދުވެސް މަސައްކަތްކުރެއްވި ކަމަށާއި އަބަދުވެސް އެދޭނީ އަންހެނުންނަށް އެންމެ އެދެވޭ ކުރިއެރުން ލިބުންކަމަށްވެސް ރައީސް ޔާމީން ފާހަގަކުރެއްވިއެވެ.
އަޅުގަނޑު އަންހެނުންގެ ދުވަހަކު މަރުހަބާ އެއް ނުދަންނަވާނަން. ނުދަންނަވާ އޮތީ އެހެން ސަބަބެއް. އަންހެނުންގެ ދުވަހެއް މި ފާހަގަކުރަނީ މާޗް 8 ވަނަ ދުވަސް. މާޗް 8 ވަނަ ދުވަސް ދިޔައީމަ ދެން އަންހެނުންގެ ދުވަސް އެދިޔައީ. އެހެންވިމާ އަނެއްކާވެސް ދަންނަވާލަން މިއުޅެނީ އަޅުގަނޑުމެންގެ ޕާޓީއަކުން ބޭނުމެއް ނޫނޭ އަންހެނުންގެ ދުވަސް ދުއްވާލާކަށް. އެހެންވީމާ އަޅުގަނޑުމެންނަށް އަންހެނުންގެ ދުވަހަކީ ހަމަ ހުރިހާ ދުވަހެއް. އެހެންވީމާ އަންހެނުންގެ ދުވަހުގެ ތަހުނިޔާ ދެންނެވިޔަސް އެދުވަސް އެހާ ދެރަގޮތަކަށް ދާކަށް އަޅުގަނޑުމެން ބޭނުމެއް ނޫން.
ރައީސް އަބްދުﷲ ޔާމީން އަބްދުލްގައްޔޫމް
ރައީސް ޔާމީން އިތުރަށް ވިދާޅުވީ ބައެއް ބޭފުޅުން އަންހެނުން ބާރުވެރިކުރުމުގެ ވާހަކަތައް ދައްކާ އުޅޭ އިރު އެކަން އެބޭފުޅުންގެ އަމަލުން ނުފެންނަކަމަށެވެ.
ރައީސް ޔާމީނަކީ އަބަދުވެސް އަންހެނުން ބާރުވެރި ކުރުވާ އަންހެނުންގެ ހައްގުގައި ތެދުވި ބޭފުޅެއްކަން ފާހަގަކޮށްލެވެއެވެ.
