ރައީސް އަބްދުﷲ ޔާމީނަށް އިންސާފު ނުލިބޭ މައްސަލަ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ހުށަހަޅަން މަސައްކަތްކުރަމުން ދާ ކަމަށް އެމަނިކުފާނުގެ ފަރާތްޕުޅުން ހާމަކޮށްފިއެވެ.

މިކަން ހާމަކޮށްފައިވަނީ ވ. އާރަށުގެ މައްސަލައިގައި ރައީސް ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމްގެ އިސްތިއުނާފް މައްސަލައިގެ ހުކުމް އިއްވުން ލަސްވާ މައްސަލައިގެ ކަންބޮޑުވުންތަކާ އެކު ހައިކޯޓަށް ވަޑައިގެންނެވުމަށް ފަހު އެމަނިކުފާނުގެ އާއިލާގެ ފަރާތުންނާ އަދި އެމަނިކުފާނު އަލަށް އުފައްދަވަން މަސައްކަތްޕުޅު ކުރައްވަމުން ގެންދަވާ ޕާޓީގެ އިސްކޮށް ހަރަކާތްތެރިވާ ބޭފުޅުން ދެއްވި އިންޓަރވިއުގައެވެ.

ރައީސް ޔާމީނަށް އިންސާފު ނުލިބި ލަސްވާ ލަސްވުމާ މެދު ކަންބޮޑުވުން ފާޅުކުރައްވަމުން އެމަނިކުފާނުގެ ގާނޫނީ ޓީމުގައި ހަރަކާތްތެރިވެވަޑައިގަންނަވާ އަލްއުސްތާޛު އަލީ ޝާހު ވިދާޅުވީ، އެ މައްސަލާގައި ވަކީލުންގެ ޓީމަށް ކުރެވިދާނެ މަސައްކަތްތަކެއް އެބަހުރި ކަމަށެވެ. އެގޮތުން އެންމެ މުހިއްމު އަދި އިސްކަމެއްގެ ގޮތުގައި މިހާރުކުރިއަށް ދަނީ ހުކުމް ކުރުން ލަސްވެ، އިންސާފު ލިބުން ލަސްވަމުންދާ މައްސަލަ ރައީސްގެ އަރިހަށް ގެންދެވޭނެ ގޮތެއް އޮތްތޯ މަޝްވަރާކުރުން ކަމަށެވެ.

ޝާހު އިތުރަށް ވިދާޅުވީ، ހައި ކޯޓުގައި އޮތް ރައީސް ޔާމީންގެ އިސްތިއުނާފް މައްސަލަ ހުކުމް ކުރުމާ ހަމައަށް ގޮސްފައިވާއިރު، އެ މައްސަލާގެ ހުކުމް ކުރުން ލަސްވަނީ ކީއްވެކަމެއް ބުނެނުދެވުމަކީ ނުފޫޒު އޮތް މިންވަރު ހާމަވާ ކަމެއް ކަމަށެވެ.

ރައީސް ޔާމީންގެ ހުކުމުގެ އަޑު އެހުން ތާވަލްނުކޮށް ލަސްކުރަމުންދާއިރު މީގެ ކުރިން ވެސް އެކަން ސާފުކުރަން ހައި ކޯޓަށް ރައީސް ޔާމީންގެ ޓީމުން ގޮސްފައި ވެއެވެ. އެއިން ކޮންމެ ފަހަރަކު ވެސް ހައި ކޯޓުން ދޭ ޖަވަބަކީ ވީހާ ވެސް އަވަހަށް ހުކުމް ކުރަން މަސައްކަތް ކުރަމުން އަންނަ ކަމަށެވެ. ނަމަވެސް ހުކުމާ ހަމައަށް ވާސިލްވެ 2 މަސް ދުވަސް ފައިތުވާން ކައިރިވެފައިވާއިރު ހުކުމުގެ މަޖިލިސް ތާވަލްނުކުރުމަކީ އެއީ ގާނޫނީ ގޮތުން ދެރަވަރު ކަމެއްގެ ގޮތުގައި ގާނޫނީ ފަންނުގެ ގިނަ ބޭފުޅުން ފާހަގަކުރައްވައެވެ