ރައީސް ޑރ މުހައްމަދު މުއިއްޒުގެ ސަރުކާރަށް، ރައީސް އިބްރާހިމު މުހައްމަދު ސޯލިހު (އެމްޑީޕީ) ސަރުކާރުގެ ވާހަކަ ދެއްކެން ނެތް ކަމަށް ކެންދޫ ދާއިރާގެ ކުރީގެ މެމްބަރު އަލްއުސްތާޛު އަލީ ހުސެއިން ވިދާޅުވެއްޖެއެވެ.

ޗެނަލް1ގެ ނިއުސް ޓޯކު ޕްރޮގްރާމުގައި ވާހަކަ ދައްކަވަމުން އަލީ ވިދާޅުވީ، މިއީ ރައްޔިތުންނަށް ކުލައިން ކުލައިން އުފާވެރިކަމުގެ ސިގްނަލްތައް ދެމުން އައި ސަރުކާރެއް ނަމަވެސް މި ސަރުކާރުގައި ރައްޔިތުން ތިބެން ޖެހިފައިވަނީ އެންމެ އަސާސީ ހިދުމަތްތަކުންވެސް މަހްރޫމުވެފައި ކަމަށެވެ.

އެގޮތުން އޭނާ އިޝާރާތްކުރެއްވީ އޭނާގެ އުފަން ރަށް، ކެންދޫގައި ދާދި އިހަކަށް ދުވަހު ރައްޔިތުން ކަރަންޓަށް ޖެހި 38 ފަހަރު ކަރަންޓުގެ ހިދުމަތުން ރަށުގެ ރައްޔިތުން މަހްރޫމުވެ ކަނު އަނދިރީގައި ތިބެން ޖެހުނު ޖެހުމެވެ.

އަލީ ވިދާޅުވީ ގައުމުގެ ކަންކަން ހިނގަނީ ޚަރާބުގެ މަގުން ކަން ހަމެކަނި އެކަމަށް ބަލާލިއަސް އެނގޭނެ ކަމަށެވެ.

އަލީ ވިދާޅުވީ ރިޔާސީ އިންތިހާބުގައި ރައްޔިތުންނަށްވީ ވައުދުތަކުގެ ބައިކުޅަ ބައިވެސް ފުއްދާފައި ސަރުކާރުން ނުވާއިރު ކުޑަމިނުން އިގްތިސޯދީ ގޮތުން ގައުމު އޮތީ ނުކިސިޔާރުކޮށް ކަމަށެވެ. އެގޮތުން ޑޮލަރުގެ އަގު މަތިވެ ތަކެތީގެ އަގު އުފުލިގެން ދިޔައީ ރައްޔިތުން ބަލަބަލާ ޑޮލަރުގެ އަގު ތިރިވާނެ ކަމަށް ތިއްބާ ކަމަށް ވެސް އަލީ ވިދާޅުވިއެވެ.

އަލީ އިތުރަށް ވިދާޅުވީ، ކަންކަން ގޯސްކޮށް ހިންގަމުންދާތީ ރައްޔިތުންގެ ނުރުހުން ސަރުކާރަށް އަމާޒުކުރުމުން ދިފާއުގައި މި ސަރުކާރުން ދައްކަނީ ކުރީ ސަރުކާރުގެ ބަހަނާކަމަށެވެ. ނަމަވެސް އެއީ މި ސަރުކާރަށް ދެއްކޭނެ ބަހަނާއެއް ނޫން ކަމަށާ އެހެނީ މި ސަރުކާރު ރައްޔިތުން ވޯޓަކުން ބަދަލުކޮށް ގެނައީ ބަދަލަކަށް އެދި ކުރިން ހުރި ގޯސްތައް ރަގަޅުކުރަން ކަމަށްވުން ކަން ވެސް އަލީ ފާހަގަކުރެއްވިއެވެ.

އަލީ ވިދާޅުވީ ކަންކަން ރަގަޅުކުރަން ވެރިކަމަށް ގެނައުމުން މިސަރުކާރުން ކުރީ ސަރުކާރުގެ ބަހަނާ ދައްކާ ދަނީ އެއަށް ވުރެވެސް މާ ގޯސްކޮށް ކަންކަން ކުރަމުން ކަމަށެވެ.

އަލީ ވަނީ މި ސަރުކާރުން ކައުންސިލް އިންތިހާބުގައި ސަރުކާރު ކެންޑިޑޭޓުންނަށް ވޯޓުދީގެން ތަރައްގީ ނުގެނެވޭނެ ކަމަށް ބުނަމުންދާ ދިއުމާ މެދުވެސް ނުުރުހުން ފާޅުކުރައްވާފައެވެ. އަލީ ވިދާޅުވީ، އަތޮޅު ކައުންސިލްތައް އުވާލާ، ރައްޔިތުންގެ ބާރު ރައްޔިތުން އަތުން ނިގުޅައިގަތް ބަޔަކަށް އިތުރަށް ދޭން ޖެހޭ ވޯޓެއް ނޯންނާނެ ކަމަށެވެ.