ޕެންޝަން ރިޒާވް ސަރުކާރުން ބޭނުން ކުރަނީ ނަމަ މަނިޓަރީ މިނިވަންކަމަށް އިންފްލޭޝަނަރީ ރިސްކްތައް ބޮޑުވާނެ ކަމަށް ލޯކަލް ކައުންސިލް އިންތިހާބުގައި މާލޭގެ މޭޔަރު ކަމަށް ވާދަ ކުރައްވާ ގައުމީ މިނިވަން ކެންޑިޑޭޓު އިސްމާއިލް ޒަރިޔަންދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓުގައި ވިދާޅުވެފައިވަނީ، މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން ބޯޑުގެ ހުއްދަގެ ދަށުން ސަރުކާރުގެ ސެކިއުރިޓީޒް ގަތުމަށް މިހާރު ހުރި ޕެންޝަން ރިޒާވް ބޭނުންކުރި ނަމަ، އެއީ 2023 ވަނަ އަހަރުގެ ސްޓޭޓްމަންޓް އޮފް އިންވެސްޓްމަންޓް ޕްރިންސިޕަލްސްގެ ޕްރޫޑެންސް އެންޑް ލިކުއިޑިޓީ މެންޑޭޓްތަކާ އެއްގޮތްވާ ކަމެއް ކަމަށެވެ.
ނަމަވެސް މޯލްޑިވްސް މަނިޓަރީ އޮތޯރިޓީން އަލަށް އުފެއްދި ލިކުއިޑިޓީ އިންޖެކްޓްކޮށްފިނަމަ ނުވަތަ ފިސްކަލް ފައިނޭންސިން އަށް މަގުފަހިކޮށްދީފިނަމަ އެއީ ދަރަނި މޮނެޓައިޒޭޝަން ކަމުގައި ވެގެންދާނެ ކަމަށާއި، އެކަމުގެ ސަބަބުން މަނިޓަރީ މިނިވަންކަމަށް އިންފްލޭޝަނަރީ ރިސްކްތައް ބޮޑުވާނެ ކަމަށް ވެސް ޒަރިޔަންދު ވަނީ ފާހަގަކުރައްވާފައެވެ.
ޒަރިޔަންދު މިފަދައިން ވިދާޅުވެފައިވަނީ، 2.4 ބިލިއަން ރުފިޔާގެ ބޮންޑަށް މަރުކަޒީ ބޭންކް، (އެމްއެމްއޭ) މެދުވެރިކޮށް ފައިސާ ހޯދުމަށް ސަރުކާރުން ނިންމާ ޕެންޝަން އޮފީސް ބޯޑުން ފާސްކޮށްފައިވާ ދަނޑިވަޅެއްގައެވެ.
