ސަރުކާރުން އުޅެނީ އޮޅުވާލައިގެން ޕެންޝަން އޮފީސް ތެރެއިން  މަނީލޯންޑާ ކުރަން ކަމަށް ޕީއެންއެފްގެ ރައީސް، ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ އާދިއްތަ ދުވަހުގެރޭ ބޭއްވި ފްރޮންޓު އޮފީސް ޖަލްސާގައި ވާހަކަފުޅު ދައްކަވަމުންނެވެ.

ސަރުކާރުން ހުށަހަޅާފައިވާ 2.4 ބިލިއަން ރުފިޔާގެ ބޮންޑަށް، މަރުކަޒީ ބޭންކު، އެމްއެމްއޭ މެދުވެރިކޮށް ފައިސާ ހޯދުމަކީ އިގްތިސޯދަށް ގެއްލުންވާނެ ނިންމުމެއް ކަމަށް ގަބޫލު ކުރެވޭ ކަމަށް ވިދާޅުވެ، ޕެންޝަން ބޯޑުގެ ޗެއާޕާސަންގެ މަގާމުގައި ހުންނެވި އަހުމަދު އިނާޒު އާ އެމްއެމްއޭން 2.4 ބިލިއަން ރުފިޔާ ހޯދައިގެން ސަރުކާރުގެ ޓީ-ބޮންޑެއްގައި އިންވެސްޓްކުރުމަށް ޕެންޝަން އޮފީހުގެ ބޯޑުގެ އަގުލަބިއްޔަތުން ނިންމުމާ ގުޅިގެން، އެކަމާ ދެކޮޅު ހެއްދެވުމުގެ ގޮތުން، އަހުމަދު ސަރުވަޝް އާދަމް ވެސް މިދިޔަ ސެޕްޓެމްބަރުގައި ވަނީ އެ ބޯޑުން އިސްތިއުފާ ދެއްވާފައެވެ. ހަމައެއާއެކު ޖެހިގެން އައި މަހު، ޕެންޝަން އޮފީހުގެ ޗީފް ފައިނޭންޝަލް އޮފިސަރު (ސީއެފްއޯ) ހައްވާ ފަޖުވާ ވެސް މަގާމުން އިސްތިއުފާ ދެއްވި އެވެ.

އެކަންކަމަށް އިޝާރާތްކުރައްވާ ރައީސް ޔާމީން ވިދާޅުވީ، އިނާޒް އިސްތިއުފާ ދެއްވަމުން އެކްސްގައި ކުރެއްވި ޕޯސްޓުން ވެސް އެ ނިންމުން ނިންމެވީ، ޕެންޝަން އޮފީހުގެ ތެރެއިން ސަރުކާރުން މަނީލޯންޑަކުރަން އުޅޭތީކަން ސާފުކޮށް އެނގޭ ކަމަށެވެ. އެހެންކަމުން ސަރުކާރުން އުޅެނީ އޮޅުވާލުންތަކެއް އޮޅުވާލައިގެން ކަމަށާ ހިސާބު އަކުރުތައް ދޮގުނުހަދާނެ ކަމަށްވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ ދައުލަތުގައި ފައިސާ ނެތުމަކީ އުފާވާ ކަމެއް ނޫން ކަމަށާއި އެކަމުގެ ހުރިހާ ގެއްލުމެއް ލިބޭނީ ރައްޔިތުންނަށް ކަމަށެވެ.

ރައީސް ޔާމީން ވިދާޅުވީ ސަރުކާރުން މިހާރު ހިންގަން އުޅޭ މުއާމަލާތް ހިންގަން އުޅެނީ ރައީސް މުއިއްޒު ކުރިން ފައިސާ ޗާޕު ނުކުރާނެ ކަމަށް ގަދަބަސް ވިދާޅުވެފައި އޮތުމުން ކަންކަން ހަމަމަގަށް އަޅުވަން ގޮތް ހުސްވެގެން ކަމަށެވެ.

ސަރުކާރުން މަސައްކަތް ކުރަމުންދަނީ، ޕެންޝަން ފަންޑުން މިހާރު ގަނެފައިވާ 2.4 ބިލިއަން ރުފިޔާގެ ބޮންޑް އެމްއެމްއޭ އަށް ވިއްކާލުމަށްފަހު، އެމްއެމްއޭއިން ޕެންޝަން ފަންޑަށް ލިބޭ 2.4 ބިލިއަން ރުފިޔާއިން، މާލީ ވުޒާރާގެ 2.4 ބިލިއަން ރުފިޔާގެ އާ ބޮންޑަށް ޕެންޝަން ފަންޑުން އިންވެސްޓް ކުރުމަށެވެ. ނަމަވެސް އެމްއެމްއޭއިން ފައިސާ ނެރުމަކީ ފައިސާގެ ސަޕްލައި އިތުރުވެ، ފައިސާ ޗާޕުކުރުން ކަމުގައި ބެލެވޭނެ ކަމަށް އިޤްތިޞާދީ މާހިރުން ދަނީ ވިދާޅުވަމުންނެވެ.