އެމެރިކާގެ ރައީސް ޑޮނަލްޑް ޓްރަމްޕް، ސްވިޒަލޭންޑާ ދެކޮޅަށް ކަނޑައެޅި ޓެރިފްތައް އިތުރަށް ބޮޑުކުރީ އެ ގައުމުގެ ރައީސް ވާހަކަދެއްކެވި ގޮތް ކަމުނުދިޔުމުން ކަމަށް ވިދާޅުވެއްޖެއެވެ.

މިކަމާ ގުޅޭގޮތުން ވާހަކަދައްކަވަމުން ޓްރަމްޕް ވިދާޅުވީ، ސްވިޒަލެންޑުން އެމެރިކާއަށް އެކަށީގެންވާ މިންވަރަށް ޓެރިފް ނުދައްކާ ކަމަށާއި، އޭގެ ސަބަބުން އެމެރިކާގެ ވިޔަފާރީގެ ޑެފިސިޓް ނުވަތަ ގެއްލުން 42 ބިލިއަން ޑޮލަރަށް އަރާފައިވާ ކަމަށެވެ. މި މައްސަލައާ ގުޅިގެން ފުރަތަމަ އެމެރިކާއިން ނިންމީ ސްވިޒަލެންޑްގެ މުދަލުން %30 ގެ ޓެރިފެއް ނެގުމަށެވެ.

ނަމަވެސް، މި ނިންމުމާއެކު ސްވިޒަލޭންޑްގެ ރައީސް ޓްރަމްޕަށް ފޯނުން ގުޅުއްވައި މަޝްވަރާ ކުރެއްވިއެވެ. ޓްރަމްޕް ވިދާޅުވި ގޮތުގައި އެ ފޯނު ކޯލުގައި ސްވިޒަލޭންޑްގެ ރައީސް ވާހަކަދެއްކެވި ރާގާއި ގޮތް އޭނާއަށް ކަމަކު ނުދިޔައެވެ. އެހެންކަމުން، އެ ގައުމުން ޓެރިފް ކުޑަކޮށްދިނުމަށް އެދުނު ނަމަވެސް، ޓްރަމްޕް ވަނީ ބަދަލުހިފުމުގެ ގޮތުން ޓެރިފްގެ މިންވަރު %39 އަށް މަތިކޮށްފައެވެ.

ޓްރަމްޕްގެ މި ނިންމެވުމަކީ ހަމައެކަނި ޒާތީ އިހުސާސެއްގެ މައްޗަށް ބިނާކޮށް، ދުނިޔޭގެ އިގްތިސާދީ މުހިންމު ނިންމުމެއް ނިންމެވި ނިންމެވުމެއްގެ ގޮތުގައި ގިނަ ބަޔަކު ދަނީ ފާހަގަކުރަމުންނެވެ. މިކަމުގެ ސަބަބުން ދެ ގައުމުގެ ދެމެދުގައި އޮތް ވިޔަފާރީގެ ގުޅުމަށް ބޮޑެތި ލޮޅުންތަކެއް އަރާނެ ކަމަށް މާހިރުން ލަފާކުރެއެވެ.