އެއާ އިންޑިއާގެ އެއާބަސް މަރުކާގެ ބޯޓެއް، އުދުހުމުގެ ރައްކާތެރިކަމުގެ ހުއްދަ ނެތި އަށް ފަހަރެއްގެ މަތިން ދަތުރުކޮށްފައިވާތީ، އިންޑިއާގެ އޭވިއޭޝަން ރެގިއުލޭޓަރީ އިދާރާ، ޑައިރެކްޓަރޭޓް ޖެނެރަލް އޮފް ސިވިލް އޭވިއޭޝަން (ޑީޖީސީއޭ) އިން އެ އެއާލައިން އެއް ކްރޯޑް ރުޕީސް އިން ޖޫރިމަނާކޮށްފިއެވެ.

ރިޕޯޓްތައް ބުނާގޮތުގައި މިދިޔަ އަހަރުގެ ނޮވެމްބަރު މަހުގެ 24 އާއި 25 އާ ދެމެދު، އެއާބަސް އޭ320 މަރުކާގެ މި ބޯޓު ވަނީ ނިއުދިއްލީ، ބެންގަލޫރު، މުމްބާއީ އަދި ހައިދަރުއާބާދު ފަދަ ސިޓީތަކަށް ދަތުރުތައް ކޮށްފައެވެ. މި ދަތުރުތައް ކޮށްފައިވަނީ ކޮންމެހެން އޮންނަންޖެހޭ އެއާވޯދިނަސް ރިވިއު ސެޓްފިކެޓް (އޭއާރުސީ) ނެތިކަން ޑީޖީސީއޭގެ ތަހުގީގަށް ވަނީ ހާމަވެފައެވެ.

އޭއާރުސީ އަކީ ބޯޓެއްގެ ރައްކާތެރިކަމާއި ފެންވަރު ބަލައި، ކޮންމެ އަހަރަކު އެއްފަހަރު ރެގިއުލޭޓަރީ އިދާރާއިން ދޫކުރާ މުހިންމު ސެޓްފިކެޓެކެވެ. މި ސެޓްފިކެޓް ނެތި ބޯޓެއް އުދުއްސުމަކީ އޭވިއޭޝަންގެ ސަލާމަތީ މިންގަނޑުތަކާ ކަނޑައެޅިގެން ހިލާފު، ނުރައްކާތެރި އަމަލެއްގެ ގޮތުގައި ޑީޖީސީއޭ އިން ވަނީ ސިފަކޮށްފައެވެ.

މި މައްސަލައިގައި ޑީޖީސީއޭ އިން ނެރުނު އަމުރުގައި ބުނެފައިވަނީ، މިއީ އެއާލައިންގެ މެނޭޖްމަންޓުން ކަންކަމާ މެދު ބަހައްޓާ ފަރުވާކުޑަ ސިޔާސަތެއްގެ ސަބަބުން ހިނގާފައިވާ ކަމެއް ކަމަށެވެ. އަދި މި އިހުމާލުގެ ޒިންމާ އެއާލައިންގެ އެންމެ އިސްވެރިން އުފުލަންޖެހޭނެ ކަމަށް ބުނެ، އެއާ އިންޑިއާގެ ސީއީއޯ ކޭމްޕްބެލް ވިލްސަން ވެސް ވަނީ މި ކަމުގައި ޒިންމާދާރު ކުރެވިފައެވެ.