ރައީސް ޑރ މުހައްމަދު މުއިއްޒުގެ "ޖާހިލުކަމާއި މުނާފިގުކަމާ" މެދު ރައްޔިތުން ވިސްނާ ފިކުރުކުރުމަށް ވެލިދޫ ދާއިރާ މެމްބަރު މުހައްމަދު އައްބާސް ގޮވާލައިފިއެވެ.
އައްބާސް މިފަދައިން ގޮވާލެއްވީ އޭނާގެ ސޯޝަލް މީޑިޔާގައި ކުރެއްވި މާނަފުން ޕޯސްޓެއްގައެވެ.
އެގޮތުން އީރާނުގެ ރޫހާނީ ލީޑަރު އާޔަތުﷲ އަލީ ޚާމަނޭއީ ޔަހޫދީންގެ ޓެރަރިސްޓް ހަމަލާއެއްގައި ޝަހީދުކޮށްލުމާ ގުޅިގެން، ދިވެހި ސަރުކާރުން އެކަށީގެންވާ ހިތާމައެއް ފާޅުނުކުރާތީ އައްބާސް ވަނީ ދިވެހި ސަރުކާރަށާ ރައީސް މުއިއްޒަށް ވަރަށް ބޮޑަށް ފާޑުވިދާޅުވެފައެވެ.
އައްބާސް ވަނީ ސަރުކާރުގެ އަމަލުތަކުން ފެންނަނީ އިސްލާމީ އުންމަތުގެ ހިތާމައަށްވުރެ ބޮޑަށް އެހެން މަސްލަހަތުތަކަށް އިސްކަންދޭ މަންޒަރު ކަމަށް ސިފަކުރައްވާފައެވެ. މީގެ ކުރިން ކާފަރު ގައުމެއްގެ ވެރިއަކު މަރުވެއްޖެނަމަ ވެސް، ސަރުކާރުން ވަގުތުން ފަތިފައްޗަށް ތައުޒިޔާގެ މެސެޖުތަކާއި ބަޔާންތައް ނެރެ، ގައުމީ ދިދަ ވެސް ބައިދަނޑިއަށް ތިރިކުރާކަން ފާހަގަކުރައްވާ އައްބާސް ވިދާޅުވެފައިވަނީ، އިސްލާމީ ގައުމެއްގެ އެންމެ އިސް ލީޑަރު ޝަހީދުކޮށްލުމުން ވެސް ސަރުކާރުގެ އެއްވެސް ހިލަމެއް ނެތް ކަމަށާއި، މިއީ ވަރަށް ބޮޑު ތަފާތުކުރުމެއް ކަމަށެވެ.
ގައުމީ ދިދަ ތިރިކުރަނީ ހަމައެކަނި ކާފަރުންގެ ވެރިންނަށްތޯ؟" ސުވާލު އުފައްދަވަމުން އައްބާސް ވަނީ އިނގިރޭސި ރާނީ ފަދަ ލީޑަރުން މަރުވުމުން އަމަލުކުރި ގޮތާއި މިއަދުގެ ހާލަތާ އަޅާކިޔައި އެއީ ރައީސް މުއިއްޒުގެ "ޖާހިލުކަމާ މުނާފިގުކަން" ހާމަވާ ކަމެއްގެ ގޮތުގައި ދޭހަވާ ފަދަ މޭރުމަކުން ވިދާޅުވެ އެކަމާ ދިވެހި ރައްޔިތުން ވިސްނުމަށް ގޮވާލައްވާފައެވެ.
ޚަމާނާއީ އަވަހާރަކޮށްލުމުން ދިވެހި ސަރުކާރުން މިހާތަނަށްވެސް އެއްވެސް ބަހެއް ބުނެފައިނުވެއެވެ. އަދި އެންމެ ކުޑަ މިނުން ތައުޒިޔާއާ ހަމްދަރުދީގެ މެސެޖެއްވެސް ފޮނުވާފައިނުވެއެވެ. މިކަމާ ގުޅިގެން ނޫސްވެރިން ސުވާލުކުރުމުން ރައީސް މުއިއްޒު ވިދާޅުވީ ތައުޒިޔާ ނުކިޔާނަމެކޭ ވިދާޅުނުވާނެ ކަމަށެވެ.
އިސްލާމީ އުއްމަތުގެ ލީޑަރަކު ޒަޔަނިސްޓުންގެ ހަލަމާއެއްގެ އަވަހާރަވުމުން ވެސް އިސްލާމީ ދައުލަތެއްގެ ހައިސިއްޔަތުން ދިވެހިރާއްޖެއިން ބަސްނުބުނެ އޮތުމަކީ ލަދުވެތި ކަމެއްގެ ގޮތުގައި ގިނަ ދިވެހިން ދަނީ ފާހަގަކުރަމުންނެވެ.
