ހައްޤުބަސް ބުނުމާއި ހައްޤައް ވަކާލާތުކުރުމުގައި އެކަކުވެސް ބިރުން ފަހަތަށް ޖެހިގެން ނުވާނެ ކަމަށް ވެލިދޫ ދާއިރާގެ މަޖިލިސް މެމްބަރު މުހައްމަދު އައްބާސް ވިދާޅުވެއްޖެއެވެ.
އައްބާސް މިފަދައިން ވިދާޅުވީ، އެކްސްގައި ހިއްސާކުރެއްވި ޕޯސްޓެއްގައެވެ. އޭނާ ފާހަގަކުރެއްވި ގޮތުގައި، މިހާރު ފެންނަމުންދަނީ އަނިޔާވެރި ވެރިކަމެއް ކަމަށާ އެ ވެރިކަން ނިމުމަކަށް އަންނާނީ ޤައުމުގެ ހައްޤުގައި ބަޔަކު ނުކުމެ ބޮޑެތި ޤުރުބާނީތަކެއް ވެގެންނެވެ.
ނުބައި، ނުލަފާ، ދޮގުވެރި، މަކަރުވެރި، އަނިޔާވެރިއެއްގެ ކުރިމަތީގައި ރައްޔިތުންގެ ހައްޤައް ވަކާލާތުކޮށް ހައްޤުބަސް ބުނަންޖެހުނު ކޮންމެ މާލަމެއްގައި ހައްޤުބަސް ބުނެގެން ޖަލައް ދާންޖެހުނަސް އެކަމަށް ތައްޔާރުވެ ސާބިތުކަންމަތީ އޭނާ ހުރި ކަމަށްވެސް އައްބާސް ވަނީ ވިދާޅުވެފައެވެ.
އަނިޔާވެރިކަމާއި ދޮގާއި މަކަރުވެރިކަމާ ދެކޮޅަށް ތެދުވުމަކީ މުހިއްމުކަމެއްކަން ފާހަގަކުރައްވާ އައްބާސް ވަނީ، އަނިޔާވެރިކަން ނިންމުމަށް ހައްޤުބަސް ބުނުމާއި ހައްޤައް ވަކާލާތުކުރުމުގައި އެކަކުވެސް ބިރުން ފަހަތަށް ޖެހިގެން ނުވާނެ ކަމަށް ވެސް ވިދާޅުވެފައެވެ.
އައްބާސް މިފަދައިން ވިދާޅުވެފައި މިވަނީ، މި ސަރުކާރުން ޝަރުއީ ދާއިރާއަށް ނުފޫޒު ފޯރުވާކަމަށާއި، ނޫސްވެރިކަމުގެ މިނިވަންކަން ނިގުޅައިގަނެފައިވާ ކަމަށް ބުނެ، ބައެއް ފަރާތްތަކުން ކަންބޮޑުވުން ފާޅުކުރަމުންދާ ދަނޑިވަޅެއްގައެވެ.
