ރައީސް ޑރ މުހައްމަދު މުއިއްޒު ބުނާ މީހަކު މާލޭގެ މޭޔަރު ކަމަށް ހޮވުމަކީ ރައީސް އޮފީހުގައި "ގަރުދިޔަ މިނިސްޓަރު" ކައިރީގައި މަސައްކަތް ކުރާ ޑެސްކެއް ގާއިމުކުރުން ކަމަށް ޕީއެންއެފްގެ ރައީސް، ރައީސް އަބްދުﷲ ޔާމީން ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ އެމަނިކުފާނުގެ އެންޑޯޒްމަންޓާ އެކު މާލެ ސިޓީ ރީސެޓުކުރަން ކުރަން ނުކުންނަވާ ގައުމީ ކެންޑިޑޭޓު އިސްމާއިލް ޒަރިޔަންދުގެ ކެމްޕެއިން ހަރަކާތެއްގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
ރައީސް ޔާމީން ވިދާޅުވީ އެމަނިކުފާނަކީ މާޒީގައިވެސް އަދި މިހާރުވެސް ޒަރިޔަންދުއާ ގާތް ގުޅުން އޮންނަ ބޭފުޅެއް ނޫން ކަމަށާ އެމަނިކުފާނު ޒަރިޔަންދު އިޚްތިޔާރު ކުރީ ގައުމީ މަސްލަހަތަށް ކަމަށެވެ. އެގޮތުން މިއަދު މާލެއަކީ ހުރިހާ ދިމާއަކުންވެސް ފެއިލްވެފައިވާ ސިޓީއެއްގެ ގޮތުގައި ފެންނަމުންދާ ދިއުން ނިމުމަކަށް ގެނެސް މުޅިން އައު މާލެއެއް ބިނާކުރެވޭނީ ޒަރިޔަންދު ފަދަ ކޮރަޕްޝަން ފްރީ މީހަކު މޭޔަރު ކަމަށް އައިސްގެން ކަމަށް އެމަނިކުފާނަށް ގަބޫލު ކުރެއްވޭތީ ޒަރިޔަންދު ޚިޔާރު ކުރެއްވީ ކަމަށްވެސް ރައީސް ޔާމީން ވަނީ ވިދާޅުވެފައެވެ.
ރައީސް ޔާމީން ވިދާޅުވީ ވެރިކަމުގައި ތިބޭ ބަޔަކު ބުނާ މީހަކު ނުވަތަ ވެރިކަން ކުރާ ޕާޓީއިން މީހަކު ހޮވައިގެން ނަޒާހާތްތެރިކަމާ އެކު ރައްޔިތުންގެ ހައްގުގައި މަސައްކަތްކުރެވިދާނެ ކަމަށް ގަބޫލުނުކުރައްވާ ކަމަށާ އެފަދަ މީހަކު ހޮވުމަކީ ރައީސް އޮފީހުގައި، "ގަރުދިޔަ މިނިސްޓަރު" އަރިހު މަސައްކަތްކުރަން މީހަކު ހޮވާ ޑެސްކެއް ގާއިމު ކުރުން ކަމަށް އެމަނިކުފާނަށް ސިފަކުރެއްވޭ ކަމަށް ރައީސް ޔާމީން ވަނީ ވިދާޅުވެފައެވެ.
ރައީސް ޔާމީން އިތުރަށް ވިދާޅުވީ، މާލެ ރީސެޓުކުރަން ޖެހެނީ މާލެއަކީ ރާއްޖޭގެ މޫނު ބަލާ ލޯގަނޑު (ވެރިކަން ކުރާ ރަށް) ކަމަށްވުމުން ކަމަށެވެ.
