މެދުއިރުމަތީގައި ކުރަމުންދާ ހަނގުރާމައިގައި އިރާންގެ މުސްލިމުންނަށް ކުރިމަތިވަމުންދާ ހިތްދަތިކަމަށް ކެތްކުރުމުގެ ހިތްވަރު އެ ރައްޔިތުންނަށް މިންވަރު ކުރައްވާ، އެގައުމުގެ ސިފައިން މި ރަމަޟާން މަހު ކުރަމުންދާ މަތިވެރި ޖިހާދަށް ނަސްރު ދެއްވުން އެދި ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ދުއާ ދަންނަވައިފިއެވެ.
ޑރ ޖަމީލު އެމަނިކުފާނުގެ އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ އެމެރިކާއިން މެދު އިރުމަތީގައި ހަނގުރާމަ ކުރަނީވެސް ދޮގު ހަދައިގެން ކަމަށެވެ. އަދި ހަނގުރާމަ ފެށި ސަބަބުވެސް އެމެރިކާއިން ބުނަނީ އެކި ފަހަރު އެކި ގޮތްގޮތަށްކަން ފާހަގަކުރައްވާ ޑރ ޖަމީލު ވަނީ މިހާރު އެމެރިކާއިން އެމީހުންގެ މީހުން މަރުވާ އަދަދުވެސް ބުނަނީ އޮޅުވާލައިގެން ކަމަށް ވިދާޅުވެފައެވެ.
ނަމަވެސް ހަނގުރާމައިގެ މިހާ ހިސާބަށް އެމެރިކާގެ 650 ސިފައިން މަރުވެފައިވާ ކަމަށް އީރާނުން ބުނި ނަމަވެސް އެމެރިކާއިން ބުނަނީ އެއީ ދޮގު އަދަދެއް ކަމަށެވެ. ޑރ ޖަމީލު ވަނީ އީރާނުގެ މުސްލިމު ރައްޔިތުންނަށާއި ހިތްވަރުގަދަ ސިފައިންނަށް ނަސްރާއި ފަތަޙަ މިންވަރު ކުރައްވުމަށް އެދި ދުއާ ދަންނަވާފައެވެ.
ޑރ ޖަމީލު މިފަދައިން ވިދާޅުވެފައިވާއިރު،ދުނިޔޭގެ ބައެއް މީޑިޔާތަކުގައިި ރިޕޯޓުކޮށްފައިވާ ގޮތުގައި އެމެރިކާގެ ސިފައިން މި ހަނގުރާމައަށް ނެރުނީވެސް ދީނީ ގޮތުން އޮޅުވާލުންތަކެއް އޮޅުވާލާ ދީން ހަތިޔާރަކަށް ބޭނުންކޮށްގެން ނެވެ.
