އިރާނާ ދެކޮޅަށް އެމެރިކާއާއި އިޒްރޭލުން ހިންގަމުންދާ އުދުވާނުތަކާ ގުޅިގެން، އުތުރު ކޮރެއާގެ ރައީސް ކިމް ޖޮންގް އުން ވަރުގަދަ އިންޒާރެއް ދެއްވައިފިއެވެ.
ކިމް ޖޮންގް އުން ވިދާޅުވީ، އިރާނުގައި ދިރިއުޅޭ އުތުރު ކޮރެއާގެ އެންމެ ރައްޔިތަކަށް ނަމަވެސް މި ހަނގުރާމައިގެ ތެރޭގައި ގެއްލުމެއް ނުވަތަ އަނިޔާއެއް ލިބިއްޖެނަމަ، އުތުރު ކޮރެއާއިން ރަސްމީކޮށް ހަނގުރާމައިގެ ތެރެއަށް ވަންނާނެ ކަމަށެވެ. މިއީ އިރާނާ ދެކޮޅަށް އެމެރިކާއާއި އިޒްރޭލުން ދެމުންދާ ހަމަލާތަކާ ގުޅިގެން އުތުރު ކޮރެއާގެ ރައީސް ދެއްވި އެންމެ ހަރުކަށި އިންޒާރެވެ.
މި ދަނޑިވަޅަކީ މެދުއިރުމަތީގައި އިޒްރޭލުން ހިންގަމުންދާ ލާއިންސާނީ އަމަލުތަކާއި، އެމެރިކާގެ އެހީތެރިކަމާއެކު އިރާނަށް އަމާޒުކޮށްދޭ ހަމަލާތައް އިތުރުވަމުންދާ ވަގުތެކެވެ. އުތުރު ކޮރެއާއަކީ އަބަދުވެސް އިރާނާ ގާތް ގުޅުމެއް ބާއްވާ އަދި ހުޅަނގުގެ ނުފޫޒާ ދެކޮޅަށް މަސައްކަތްކުރާ ގައުމެކެވެ.
މި ބަޔާނާއެކު ބައިނަލްއަގުވާމީ މަސްރަހުގައި ނުތަނަވަސްކަން ވަނީ އިތުރުވެފައެވެ. މަސްރަހު ދިރާސާކުރާ ފަރާތްތަކުން ބުނާ ގޮތުގައި، އުތުރު ކޮރެއާ ފަދަ ނިއުކްލިއާ ބާރަކުން މިފަދަ ހަނގުރާމައެއްގެ ތެރެއަށް ވަދެއްޖެނަމަ، މުޅި ދުނިޔޭގެ މަސްރަހު ބަދަލުވެގެންދާނެއެވެ.
އިރާނާއި އުތުރު ކޮރެއާއާ ދެމެދު އަސްކަރީ އަދި ޓެކްނޮލޮޖީގެ ރޮނގުން ގާތް ގުޅުމެއް އޮންނައިރު، ކިމްގެ މި އިންޒާރަކީ އެމެރިކާއާއި އިޒްރޭލުގެ އުދުވާނުތައް ހުއްޓުވުމަށް އެޅި ވަރުގަދަ ފިޔަވަޅެއްގެ ގޮތުގައި ބެލެވެއެވެ.
