ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އެއްބަނޑު އެއްބަފާ ކޮއްކޮ އަދި ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ފާތިމަތު ސައުދާގެ ބޭންކް އެކައުންޓަށް 2.4 މިލިއަން ރުފިޔާގެ ނަގުދު ފައިސާ ޖަމާކުރި މައްސަލައެއް ފަޅާއަރައި، އެކަން މަރުކަޒީ ބޭންކް (އެމްއެމްއޭ) އިން ބަލަން ފަށައިފިއެވެ.
މި ފައިސާ ޖަމާކޮށްފައިވާ މައްސަލަ އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) އަށް ފާހަގަވެފައިވާއިރު، މިކަމާ ގުޅޭގޮތުން ސައުދާ ވިދާޅުވީ އެއީ ވިޔަފާރިވެރިއެއްގެ އަތުން ނެންގެވި "ސްޓޫޑެންޓް ލޯނެއް" ކަމަށެވެ. އަދި އެކަމާ ގުޅޭ ހުރިހާ ލިޔެކިޔުމެއް ބޭންކަށް ހުށަހަޅާފައިވާނެ ކަމަށްވެސް އޭނާ ވިދާޅުވިއެވެ. ނަމަވެސް، އެހާ ބޮޑު އަދަދެއްގެ ފައިސާ ނަގުދުކޮށް (ކޭޝްކޮށް) ހަވާލުކުރި ސަބަބާއި، އެ ފައިސާ ދިނީ ކޮން ވިޔަފާރިވެރިއެއްތޯ ސުވާލު ކުރުމުން ސައުދާ އެއްވެސް ޖަވާބެއް ދެއްވާފައެއް ނުވެއެވެ.
ސައުދާ މަޖިލީހަށް ހުށަހަޅާފައިވާ މާލީ ބަޔާނަށް ބަލާއިރު، އޭނާއަށް އަހަރަކު ލިބޭ އާމްދަނީއަކީ ގާތްގަނޑަކަށް 990,000 ރުފިޔާއެވެ. އަދި މާލީ ބަޔާން ހުށަހެޅިއިރު އެކައުންޓުގައި ހުރީ އެންމެ 78,000 ރުފިޔާއެވެ. ލޯކަލް ކައުންސިލް އިންތިހާބު ކައިރިވެފައި ވަނިކޮށް، އާމްދަނީއާ ނުބައްދަލު މިފަދަ ބޮޑު އަދަދެއް އެކައުންޓަށް ވަނުމުން ގިނަ ބައެއްގެ ސުވާލުތައް ވަނީ އަމާޒުވެފައެވެ.
މި މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ރަސްމީކޮށް ބަލަން ފެށިކަން އަދި ކަށަވަރެއް ނުވެއެވެ. ނަމަވެސް، މި ސަރުކާރުގެ އިސްވެރިންނާއި، ސީދާ ރައީސް މުއިއްޒާ ގުޅުންހުރި ކޮރަޕްޝަންގެ ގިނަ މައްސަލަތަކެއް އޭސީސީއަށް ހުށަހެޅިފައިވީ ނަމަވެސް، އެ މައްސަލަތައް ކުރިއަށް ނުދާކަމުގެ ޝަކުވާ ވަނީ ބޮޑުވެފައެވެ.
