ދިވެހިރާއްޖޭގެ ޑިފެންސް މިނިސްޓަރު މުހައްމަަދު ޣައްސާން މައުމޫން، އެމެރިކާގެ ރައީސް ޑޮނަލްޑް ޓްރަމްޕު ރާއްޖެއަށް ފޮނުއްވި މަންދޫބު ސާޖިއޯ ގޯއާއެކު ބޭއްވެވި ބައްދަލުވުމުގެ ތަފްސީލުތައް ހާމަކުރަން ދިވެހި ސަރުކާރުން ދެކޮޅު ހަދައިފިއެވެ.
އެ މައުލޫމާތު ހިއްސާކުރަން ސަރުކާރުން ދެކޮޅު ހަދާފައިވަނީ، ގައުމީ ސަލާމަތަށް ނުރައްކާވެދާނެތީ ކަމަށް ބުނެއެވެ.
ގޯ ވަނީ ޣައްސާންގެ އިތުރުން ހާރިޖީ ވަޒީރު އަބްދުﷲ ހަލީލުއާ ބައްދަލު ކުރައްވައިފައެވެ. އަދި އޭނާގެ ބައްދަލުވުމެއް ރައީސް މުހައްމަދު މުއިއްޒުއާވެސް ބައްދަލުވުމެއް ތާވަލްކުރެވިފައި އޮތް ނަމަވެސް ހޯދަ ދުވަހު ބޭއްވި ނޫސްވެރިންގެ ބައްދަލުވުމުގައި އެމެރިކާގެ ބޭސްތަަކަށް ހަަމަލާދިނުމަށް ބާރުއަޅާ ފަދަ މޭރުމަކުން ރައީސް މުއިއްޒު ވާހަކަފުޅު ދެއްކެވުމުން ގޯ ވަނީ ރައީސް މުއިއްޒުއާ ބައްދަލުނުކޮށް ރާއްޖެއިން ފުރާފައެވެ.
ޑިފެންސް މިނިސްޓްރީގެ ތަރުޖަމާނަކާ ހަވާލާދީ ބައެއް މީޑިޔާތަކުގައި ރިޕޯޓުކޮށްފައިވާ ގޮތުގައި، ގޯއާއެކު ޣައްސާން ކުރެއްވި މަޝްވަރާތައް ހާމަކޮށްފިނަމަ ރާއްޖޭގެ ގައުމީ ސަލާމަތަށް ނުރައްކާތަކެއް ކުރިމަތިވެދާނެއެވެ. އެހެންކަމުން އެ މަޝްވަރާތަކުގައި ދެއްކި ވާހަކަތައް ހާމަކުރެވެން ނެތް ކަމަށްވެއެވެ.
ނަމަވެސް އެއ ބައްދަލުވުންތަކަށް ފަހު ގޯ އެކްސްގައި ހާމަކޮށްފައިވާ ގޮތުގައި، ދެ ގައުމުގެ މެދުގައި އޮތް ގުޅުމާއި ސަރަހައްދީ މަސްލަހަތާ ގުޅޭ ގޮތުން ދިވެހި ސަރުކާރާ އެކު މަޝްވަރާ ކުރެވިފައިވެއެވެ. އޭނާ ހާމަކޮށްފައިވާ ގޮތުގައި، މި އަހަރަކީ ދެ ގައުމުގެ ދެމެދުގައި ސިޔާސީ ގުޅުން ގާއިމުކުރިތާ 60 އަހަރު ފުރޭ އަހަރަށް ވާއިރު، އިސްތިރާތީޖީ ގޮތުން މުހިންމު ދާއިރާތައް ދެނެގަނެ، ގުޅިގެން މަސައްކަތް ކުރެވޭނެ ގޮތްތައް ހޯދުމަކީ ނުހަނު ބޭނުންތެރި ކަމެއް ކަމަށް ވެސް ބުނެފައިވެއެވެ.
